Los Fairhalls en Extranjero

Nuevos Chilenos

2009-09-10T11:54:00.000-07:00

Ka nui te koa! Kua tae atu ki Chile tëtahi atu ope no Te Koutu. Ko Koa rätou ko ngä äkonga tokotoru. Tënä, whäia tä rätou rätaka!

El chico humilde

2009-05-11T13:16:00.000-07:00

Kei te tākaro noa! ¡Estoy jugando no más!

2009-05-10T06:53:00.000-07:00

Ko tētahi o ngā hanga pai rawa o te noho ki Chile ko te wā e wātea ai ki te whakaaroaro, ki te whai hoki i ngā mahi hōu o te ao rorohiko – he pēnei i te rātaka nei.

Ko tētahi o ngā mea i whāia i te ata nei ko te mahi Voki. Koinā tāu e kite ana i te taha katau. Hei wāhanga pea mo Te Karere o Te Koutu. Kua roa au e whakaaro ana mo ngā tikanga e pai atu ai te tono pānui ki ngā mātua me ngā hoa o te kura. Tērā pea, he rātaka pēnei.

Na, ka hoki ki te tākaro!

2009-04-30T16:43:00.000-07:00

Hei tīmatanga kōrero, he nui tonu te aroha ki mi querido México y su gente muy amable.

Engari i te hiahia hoki au ki te titiro ki nga hanga rere kē ka puta ake i te aituā nui nei. Arā, kei te tino kōrero au i ngā mea hōu ka ākona i reira.

Kātahi au ka tino mōhio ki ngā hanga o te kita. Me te kitenga i te whakaahua o taua kita nei! He uri nō ngā hoariri o ō tātou tūpuna no te tīmatanga rānō o te ora! Te matakahi e hinga ai te tōtara!

Ka ohorere i ngā whakaaro ka puta ake i te pōnānā. Aī! E hia kē ngā poaka ka mate i Īhipa?! He mea ngāwari mā ngā rangatira Mahometana o reira. Me ngā Karaitiana? Creo que es un caso de racismo.

Ahakoa tērā, kātahi anō māua ka hoki mai i te hoko kai i Santa Isabel. Whakaaroaro ai i te tokomaha o ngā tāngata i te tiriti me te rata o ngā kita ki te apiapi o te tangata!

Heoti, ō tātou hoariri, me tō tātou noho tahi, he noho roa. Koina au i whakaaro ai i te pukapuka a Iarere Taimana, he pukapuka tino pai, ko ‘Pū, Iramate, Tira’ te ingoa. Engari he whakaaro anō ā Iarere i te wā nei i te mea kei te haria ki te kōti e ngā tāngata tokorua nō Niukini. He tohu anō mo te iti o te ao e rere nei te kita!

¡Lo que me extraño!

2009-04-26T15:31:00.000-07:00

Kei te ohorere rawa au i te iti o te wā e toe ana i Chile! Pātai mai ai ngā hoa chilenos mehemea kua rite mo te hokinga atu. E rua ngā whakautu – ‘Āe’ me te ‘Kāo’. Koina tā māua kōrero i La Pampa. Después de comer la carne excelente de Chile (y de tomar el vino increíble)...

‘Kāo’ i te mea kua waia pai ki te noho i Chile. Arā, ko te kai, ko te whenua, ko te iwi... Me te mea, kua riro te mahi ma te hiahia!

Otirā, i te ata nei, i te whakarongo au ki ngā kōrerorero a Kim Hill me āna manuhiri. Koina tētahi o ngā mea e mokemoke ana au, ko te whakarongo ki a ia i ngā ata o te Rāhoroi. Te koi hoki o ana pātai me āna whakaaro mō tā ngā manuhiri e mea ai!

I tērā atu mutunga wiki i te kōrero mō ngā pukapuka hōu a M. T. Anderson rāua ko Mal Peet. Kia hoki atu ki te haukāinga ka tika tonu te tono atu i aua pukapuka! Ā, te wero pai i te hinengaro!

¡Mi pobre México!

2009-04-26T15:08:00.000-07:00

Ka aroha hoki te whenua e aroha rawa nei au. Tokohia kē nga mate i te tau kua pahure i ngā pakanga o ngā hunga hohoko pakaroro? E tata ana ki te 6,000! Koina pea te hua o te waiho noa, arā, kua roa a Mehiko e raruraru ana i te mahi māminga, i te pōhara. Na, kua riro ma Felipe Calderón hei whakatikatika...

Na, ka maha nga pūrongo kikino mo Mehiko, kātahi rā ka puta tētahi kōrero kino anō! Arā, ko te rewharewha poaka! Ka aroha hoki te whenua mīharo nei! Āhea mutu ai nga kōrero kikino mo Mehiko?

Ko te tūmanako kāore te mate nei e hora atu ki Oaxaca. Kei te āwangawanga mō ō tātou hoa oaxaqueños. Inapō kite ai māua ko Aroha i el presidente e kōrero ana i Salina Cruz mō ngā mahi whakatūpato. Kia kaua ngā Mehikano e kihikihi, e awhiwahi!

Me ngā rōpū ākonga o Aotearoa kātahi anō ka hoki i Mehiko... Ko te āhua nei kua pāngia nuitia te hunga no Rangitoto. ¡Ojalá que se recuparen pronto! Otirā, ka whakaaro i reira mō tā mātou haerenga atu ki reira. Me aha mātou a te tau e haere mai ana?

Na, hei whakakapinga, me kōrero i tā Paraka Ōpama whaikōrero i tana taenga atu ki Mehiko. Kua roa au e whakaaroaro ana i tērā. Ahakoa taku rata ki a ia, i pōuri rawa au i tana whaikōrero. He mea tene noa. He aha tā tōna hunga tohutohu?! I ngaro noa te wā hei kōrero ‘rangatira’ i te hononga o Amerika ki tētahi o ōna tino hoa tāhaki. Mate noa au i te whakarongo atu. Kāore rawa i ōrite ki tāna i Oropi. Heoti, ehara i te atua...

Kātahi rā!

2009-04-02T11:59:00.000-07:00

Kātahi anō ka mutu te mātakitaki i a Paraka Ōpama e kōrero ana i ana whakaaro mo te Hui R20 (Rōpū 20). Kātahi te tangata! I āta kōrerohia ngā mea i kitea e ia. Kāore he kōrero whakaparahako, kāore he kōrero whakahīhī. Kua whakaae a Amerika kia noho hei mema o te ao, ehara kē i te puna tohutohu.

He mihi hoki ki ana whakautu ki ngā pātai a ngā kaipūrongo. Me tana hanga māhaki ahakoa te tangata. Te whakahoahoa ki te Hainamana me Iniana, te mihi aroha ki te kaipurongo whakamutunga. He tangata atamai e aroha ana ki te iwi. Me te hanga kīnaki ko tō Ōpama hanga whakaiti. Ka nui te mīharo, ka nui te mihi!

Me te hui ake? Kei te tino whakaae ahau ki tā ngā rangatira i whakatau ai. Kei tuku noa i te hunga whaimoni kia mahi moni ahakoa te pānga ki tangata kē. Ko te tūmanako ka kikokiko ngā kōrero i ngā mahi a tērā whenua, a tērā whenua.

Dicho del día...Pepeha o te rā

2009-03-05T17:35:00.000-08:00

Anei tētahi whakataukī o konei e rata ana ahau:

Si quieres el perro, acepta las pulgas.

Ina hiahia koe ki te kurī, huia ngā keha!

Arā, me whakaae ki ngā hanga hē o tētahi hoa rānei, o tētahi mahi nui rānei. Ko tā te Pākehā, ‘Mehemea he wera rawa te kīhini mōu, e puta!’

Ko te whakaahua na te Tatimana ko Gerard ter Borch, arā, ‘Ka hāpaki te tama i tāna kurī’.

Curanto – Hāngi

2009-03-05T16:02:00.000-08:00

I te wā i haere ai mātou ko Tamsin mā ki te moutere o Chiloé, ka tuku kōrero au mo te curanto. E rua ngā momo curanto, ko tērā o te whenua, arā, ko te hāngi, me tērā o te kōhua. Koina tā mātou kai ko Luisa i tētahi rā.

No te rangi i mua haere ai māua ko Aroha ko te mākete o te pūtahitanga hoko ai i ngā longaniza (notinoti chilena), i te costillar ahumado (kaoako poaka whakaauau), i ngā trutro de pollo (waewae heihei). He kupu Mapuche te ‘trutro’.

I te rā hākari ka tae mai a Luisa me tana kōhua nui, ā, ka haere atu māua ki te feria, koina te mākete nui. Kātahi anō ka whakahoungia, he rawe te āhua. Ka hokona ngā almejas (tuangi) me ngā mejillones (kuku) me ngā papas (rīwai). Paruparu noa ngā pēke i te kai, ka hoki ki te kāinga.

Ka motumotu a Luisa i ngā kai, ka tīrahatia. Ka kōhuangia ki roto i te wai me te waina mā mo te wā roa. Engari te pai o te kakara!

Nāwai rā ka tae mai te whānau Sade Solar, ā, ka noho ki te kai. Kāore māua ko Aroha ka ohorere i te noho a Luisa i te taha o ngā tamariki, he uaua rawa ki a ia te noho i te taha o ōna rangatira! Hei aha rā, ko te kakī ururua!

Na, ka whakarite ahau ki kai curanto anō, koina te mahi āpōpō!

Papā te whatitiri!

2009-01-25T08:37:00.000-08:00

Ka wehe atu i Resistencia, ka wehe tōmuri! Ka tae ki te karāti o FlechaBus, kua raruraru te pūkaha. Ka tōmuri atu... Nāwai rā ka wehe atu, engari kīhai i roa ka pōngia mātou ko te pahi. E rua hāora pea i muri mai ka tīmata te āwhā...

Engari taua āwhā! Ānō i te rere atu mātou ko te pahi ki te mura o te ahi o tētahi pakanga nui, ko Te Arawa e tere atu ana ki Te Korokoro o Te Parata. Kōherahera mai ai te uira, i tērā pito, i tērā pito. He kanapu, he rapa, kāore he tauira, ko te hiahia a ngā atua! I ētahi wā ka tere tika te uira ki te whenua, ā, ka pahū te mura i reira. I ētahi wā ka tāwhana i te rangi ānō he iaia toto – he toto atua. I te huna a Aroha i te kanohi ki ngā ringa, he mataku noa. Engari ahau, he mīharo hiamo atu.

I te tīmatanga ka tū te pahi. Ko te āhua i te whakaaroaro te kaihautū o te pahi mehemea me haere tonu rānei, me hoki rānei. Nāwai rā ka āta haere atu. Kitekite atu ai mātou i ngā kararehe e karioi ana i te taha o te rori – he kāihe, he hōiho, he kau – pōkaikaha ana i te hanga o te pō, i te uira, i te ua.

Taetae ai mātou ki ngā tāone i te koraha kua waipuke katoa ngā tiriti. I ētahi wā ka papā te whatitiri i runga tonu i a mātou, ā, ka whakaruerue noa te pahi, ko te mutunga o te ao! Koina te hanga mō ngā hāora e toru pea. Ka ao te rā, ka puta ki te whaiao, ki te ao mārama. Kātahi te wairua ka tau.

Te reo tuhituhi...

2009-01-25T07:55:00.000-08:00

Aī! Kua tōmuri rawa te rātaka nei. Ehara i te mea he nui ngā mahi. Kāore te kura e tīmata anō tae noa ki te mutunga o Pepuere!

Ko tā māua ko te tirotiro ki ngā putanga o ngā ākonga o Te Koutu me te whakatau kōrero i reira. Ko te hanga nei i pai te Tau 11 i te taha o Maru. He pai hoki ngā putanga mo te Waihanga (he pai rawa atu) me te Reo Rangatira. Ko te hanga kino rawa ko te maha o ngā putanga i te ngaro, arā, ko ngā mea rāroto kāore i tāpiritia atu. Ko te mate i tae tāreparepa atu ngā pepa ki ngā ākonga me ō rātou whānau.

Ko tā māua hoki ko te pānui – me Aroha hoki! Kāore au i te mōhio ki te hāora i moe ai a Aroha inapō engari he tōmuri rawa. He aha ai? Kia mutu rānō te pānui i tana pukapuka, ‘Serena’ na Ron Rash. Engari te pai o te pukapuka! He momo ‘MacBeth’, arā, he aha te mutunga mai o te hiamana... E kī!

I mua i tērā ko ‘Te Wharetūroro’ (‘The Pesthouse’) na Jim Crace. Ka mīharo ki ngā kaituhi e kaha ana ki te whakaahua i te ao mō ngā kōrero, koina hoki tā Jim Crace, he ao no muri rawa atu nei. He āhua rite ki tā Cormac McCarthy, ki ‘Te Rori’. Ahakoa ehara te pai i te pērā (he pukapuka e pērā ana te pai?!), i rata tonu atu. Kia hoki ki Aotearoa me rapu ētahi atu pukapuka na Jim Crace.

Ko te pukapuka tuatahi i pānuihia ko ‘Ngā Wāhine Tokoono a Hēnare VIII’ na Antonia Fraser, engari i roto i te reo Paniora, ‘Las seis esposas de Enrique VIII’. I a au e tamariki ana ko Ana Boleyn te tino wahine, he pānga no te hītori Mihinare, i te mea ko ia te whaea o tērā o ngā tino kuini, o Irihāpeti I! Ka aroha hoki a Katerina o Arakona!

Na, ko te pukapuka whakamutunga ko ‘Edgar Sawtelle’ na David Wroblewski. He pērā me ‘Serena’, kei te whai i tētahi o ngā tauira a Wīremu Shakespeare, engari ko ‘Hamlet’. Me mihi i konei ki te atamai whakaharahara o taua tangata, e pāorooro tonu nei ana kōrero. Otirā, koinei tētahi o ngā tino pukapuka i pānui ai au. Ānō he kawa no te ao, he utu hoki mō ngā hara, na, i ētahi wā ka ea te utu i te hunga harakore. Na, ka āta ahu atu te waitara ki tōna mutunga maiki, ka hemo te kaipānui i te aroha ki a Tuahangata me te tūmanako whakamomori e parea atu tōna utu. Aeha!

¡Hace Calor!

2009-01-08T09:24:00.000-08:00

Ka wehe i Puerto Iguazú ma runga pahi i te 11:30 i te ata, kotahi hāora e tōmuri ana! He roa te haerenga ki Resistencia, 11 hāora. Tokorua ngā tamariki i ruaki, kotahi i mua tonu i a māua. E toru hoki ngā wā i āta tirohia te pahi e ngā pirihimana, ngā uruwhenua me ngā pēke. Ahakoa ērā hanga hoha, he pai rawa te haerenga ki a au. He papatahi rawa te whenua, engari ka kitea te kawenga kētanga o te whenua i te whakatatanga atu ki Resistencia. Ka ngaro te wao i tua atu o Posadas, ā, ka huri hei mānia. He maha ngā manu, me ngā momo manu. Engari te rahi o ngā kōtare, he rite ki tō te kookaburra o Ahitereiria. Ehara te kōtuku i te manu tapu i konei i te maha!

Ka whakawhiti i te awa whānui rawa, ko te Paraná, i tua atu i te tāone nui o Corrientes. Ka tae ki tāwāhi kua rere kē te whenua, ka nui ngā niu e tupu ana i te mānia. Koina te tīmatanga o El Chaco, he mānia nui rawa. Ahakoa te hoihoi o te pahi me ngā tini motokā ka rongo i ngā tarakihi i waho. Kātahi te hoihoi! Na, ka tae ki Resistencia ka rongo i te wera, auē! I whakaingoatia te tāone nei mo te maha o ngā huakanga a te tangata whenua inamata!

Ka oho i te ata ka haere ki te kimi i ngā wharetaonga, engari i te kati! Ka tae hoki ki te pāka tirotiro haere ai i ngā whakapakoko, he rongonui a Resistencia i reira. Ko tētahi i kitea ko tō Fernando, he kurī i arohaina nuitia e te iwi o te tāone. Nāwai rā kua patua rawatia e te wera, ¡como una sauna! Ka oma atu ki te toa aihikirimi, ka mutu, ka oma atu ki te toa pukapuka me te aire acondicionado. Na, i reira ki te wharekai.

Ka mutu te kai, ka puta ki waho, kua kore ngā tāngata! Ko te wā o te siesta, ko ngā pōrangi nō tāwāhi anahe i waho! Ka hoki ki te hotera tatari ai i ngā pūeru o te whare horoi me te pahi e whakawhiti atu ai i El Chaco ki te tāone o Salta. Ka taha atu i ngā tini rākau mango e tupu ana i te taha o ngā tiriti, me ngā hua huhua o runga. Ka whakaarohia te utu i Aotearoa, aī!

Tres países – E toru ngā whenua

2009-01-08T09:05:00.000-08:00

I te rangi tuatahi i Puerto Iguazú, i haere atu māua ko Aroha ki te pito whaka te raki o Argentina. I ērā atu taha o ngā awa (ko te Paraná, ko te Iguazú), i kitea ngā whenua ko Paraguay me Brasil!

Ka oho i te ata, ka rapu tikanga e wehe atu ai i Puerto Iguazú. Ka 24 hāora te haerenga atu ki Córdoba, kāore rawa a Aroha i whakaae atu. I te mutunga atu ka hokona ngā tīkiti ki Resistencia. Ka rite ngā mahi, ka haere ma runga pahi ki tērā atu taha o te awa Iguazú, ki Brasil!

Ka puta i te whare uruwhenua brasileña ka haere ma runga tēkihi ki Itaipú. Koina tētahi o ngā pāpuni nui rawa o te ao, engari te nui! He tino pai ngā whakaritenga mo te hunga tirotiro. Ka eke ki runga i te pahi hau mātao, ka haere atu ki te ngutu o te pāpuni. Ka mutu te tirotiro, ka heke ki roto, i te taha Paraguay (ko te whenua tuatoru o te rā!). Ka heke i te papahiki ki raro rawa atu titiro ai ki tētahi o ngā mīra hiko. Ka nui te mīharo ki tā te tangata mahi!

Ka hoki ki te tari tūtaki atu ai i a Alvino, i te kaitaraiwa tēkihi, ā, ka whakawhiti atu i El Puente de la Amistad (Te Arawhiti Whakahoahoa) ki Paraguay. I runga i tā māua tohe ko Aroha ka peka atu ki te whare uruwhenua (ahakoa ka uruuru poka noa te nuinga). Na, ka meatia mai me tiki pepa whakauru mehemea nō Aotearoa! Nō reira i hoki tika ki Brasil! Heoti, i tae atu...

Ka waiho a Alvino i a māua i tētahi wharekai i te tāone nui o Foz do Iguaçu. Engari te pai o te kai – ka nui ngā momo kōrau me ngā momo mīti. Ka mutu, ka haere ma raro ki tērā pito o te pūtahitanga tatari ai i te pahi, ā, ka hoki ki

Argentina

Las Cataratas – ¡inolvidable!

2009-01-08T08:41:00.000-08:00

Koinei te rā ka kite i tētahi o ngā tino mea whakamīharo o te ao, ko ngā waiheke Iguazú! Ka tae atu ki te pāka, ka ohorere i te pai me te mā o taua wāhi, kāore he para, he hōu rawa te hanga o ngā whare me ngā ara katoa.

Ka mātua whai atu i te sendero inferior (te ara tōraro). Ka kōpikopiko haere, kātahi anō ka kite i ētahi o ngā waiheke. He uaua te whakakupu i ngā whakaaro, i te mīharo ki te kitenga atu. Te rahi, te nui, te ātaahua, te whakamataku hoki! Me te hanga o te whenua, te kākāriki o te kūwao, te kikorangi o te rangi. Me ngā tini manu, ngārara, ngangara o roto! Ka heke ki te taha o te awa, ka eke ki runga i ngā waka i hari ai i a mātou mā ki mua tonu i ngā waiheke. Ka mākū pai i te rehu me te wai e paratī ake ana – me te hoihoi! E toru ngā wā i tohe atu mātou ki ngā waiheke. E panapana pai ana te manawa!

Ka heke i taua waka, ka whakawhiti atu ki tētahi atu waka i tae atu ai ki te moutere i waenganui i ngā waiheke matua. I te tīmatanga e hia ke ngā kaupeka o te arapiki e tae ai ki runga. Ko tā ngā tāngata e heke ana, ‘¡Vale la pena!’ (‘Ka whai hua te mamae!’). He tika tā rātou! Ka tae ki runga, kātahi ka kite atu i ngā iguana nunui e tatri ana kia whāngaia. Ka tae atu ki tērā atu pito ka tū ki waenganui i ngā waiheke matua. Ka tū kau me te waha e tuhera ana!

Ka hoki ki tuawhenua, ka whai i te sendero superior e titiro iho ai ki ngā waiheke. Kei auau ngā kōrero! Ka mutu, ka eke i te tereina i tae atu ai ki te ara ki La Garganta del Diablo (Te Korokoro o Hātana). I te hīkoinga atu ki reira ka kitea ngā tini manu, ngā honu me te yacaré (he momo ngārara nui). Na, ka tae atu ki te waiheke nui rawa, ko taua Korokoro rā. He kino atu i tō Te Parata! Ka tū te manawa i te kitenga atu.

Ka hoki ki Puerto Iguazú, ka hīrere, ka whakatā. I te 10:00 pm ka haere atu ki te wharekai La Rueda. Engari tētahi o ngā tino kai i te hararei nei! Ko te mea pai rawa ko te pūrini, crema de maracujá (te kātete hua taera). Kātahi te rangi o ngā rangi!

Rosario

2009-01-08T08:30:00.000-08:00

Ka ahiahi, ka tae atu ki Rosario. Kua kōmarumaru te rangi, ā, ka ua i ētahi wā. Ka tae atu ki el Hotel Imperio. Ka tau, ka heke atu ki ngā tiriti o te tāone. Tokoiti ngā tāngata, ānō he tāone kēhua. Ka whakatata atu ki te awa whānui, ko te Paraná, titiro atu ai ki ngā tohu whakamaharatanga mo te haki o Argentina, na te Tianara Belgrano i hoahoa.

Kua āhua hoha i ngā tini tohu ki te mana motuhake o te whenua, me te hanga tito hītori. He tino tauira pērā ngā tohu i Rosario, me ngā whakapakoko hanga Rōmana, hanga Keriki. Me te tangata whenua? Kāore rawa e kitea i ngā tohu, i ngā whakapakoko. Ko te mana motuhake mo te hunga ohaoha!

He pai kē te rangi i muri. Ka roa tā māua hīkoikoi i te tāone, mīharo atu ai ki ngā whare tawhito. Kua kī hoki ngā tiriti i te tangata. Ko te hanga pōuri ko te tokomaha o ngā tāngata whenua e rapu kai ana i ngā ipu para (Kāore a Aroha i te rata!). Ko taua mana motuhake anō! Kei te whakaatu te whakaahua tuarua i te tohu e mea ana 'Malvinas, por siempre argentinas' ('No Argentina ngā moutere Falklands mo ake tonu atu'). Te mana...

Ka kimi i te whare i whānau ai a ‘Che’ Guevara, na, te mutunga ake he whare moni tiaki! Ko te ‘che’ he kīanga argentina (he rite te whakahua ki tā te Māori), koina i tapaina ai ki taua ingoa e ōna hoa.

Ka ahiahi rawa, ka hoki atu ki te teihana pahi, ā, ka wehe atu ki Puerto Iguazú. Hāereere noa i te pō...

El Año Nuevo

2009-01-08T08:25:00.000-08:00

Ka hoki anō ki el Café Valerio parakuihi ai. Ka mutu, ka hoki ki te hōtera noho noa ai, he putanga pea no te rā o mua. Ka ahiahi, ka heke atu ki Puerto Madera, ki te tauranga waka o Buenos Aires. Kua whakapaingia, ā, e hia kē ngā wharekai i reira ināianei. Ka hīkoi i te taha o te awakeri, me te whakawhiti i el puente de la Mujer, he arawhiti rongonui na te kaihoahoa ko Santiago Calatrava.

Ka whirihia te wharekai Tocororo (he momo manu no Cuba), engari te pai o taua whiringa. He rawe te kai, ahakoa tētahi tamaiti pōhara i whakatata poka noa mai pā ai i te ngū me te matikara paru rawa! I te rangi ka kite atu i ngā mura kāpura. Muy romántico.

I te rangi i muri, ka haere ma runga tēkihi ki te teihana pahi i Retiro, ki te wāhi i i whānakohia ai te kāmera, engari kāore he raruraru. Ka ekengia te pahi, ka wehe atu ki Rosario. Adiós, Buenos Aires. Ahakoa ngā raruraru, kei te mihi tonu ki tētahi o ngā tino tāone o te ao!

¡Ladrones! Tāhae!

2008-12-31T05:18:00.000-08:00

Engari ngā hanga rere kē e pā ai ki te tangata i te rangi kotahi!

I muri i te parakuihi i el Café Valerio (kua mōhio pai mai ngā meseros), ka haere mātou katoa ma runga tēkihi ki te wharetaonga waihanga, el Museo Nacional de Bellas Artes. Kei reira ngā mahi a ngā tohunga katoa o te ao waihanga – ko ā Dégas, ko ā Monet, ko ā Klee, ko ā Goya, ko ā Mea, ko ā Mea. Koina te hanga rangatira o te rā!

Ka hoki māua ko Aroha ma raro i te mea me peka atu ki te teihana Retiro hoko ai i ngā tīkiti ki Rosario. Kua hoki kē tōku māmā ma runga tēkihi, ā, kua hīkoi karatete atu a Valerie – i te aha, mā wai e hua? Ka tae atu ki te teihana, ka kite i ngā tohu e mea ana kua hokona katoatia ngā nohoanga tereina ki Rosario, nō reira ka haere tonu ki te teihana pahi i tērā atu taha o te mercado San Martín.

Na, ka taha atu i te mākete. I te mau taku kēhi kāmera me taku pōtae, a Chepe, i taku ringa mauī. Kātahi anō ka rongo i tētahi e kāhakihaki ana i te kāmera, kua uru atu te ringa o te tāhae i raro o te paki o te kēhi. Ka huri atu au ki te mamau i taua tangata rā, ā, ka rutua ki te papa, ko ia i raro.

Kua tīhaea atu te paki, ā, ka rere atu te kāmera ki te papa. I te ngana au ki te pupuri ki te tāhae me te toro atu ki te kāmera. Kātahi anō ka rere mai tana hoa, ka tangohia ake te kāmera, ka oma atu ai rāua ko tētahi atu hoa ki muri i ngā whare. Ahakoa taku hiahia kia mau ki te tāhae tuatahi kua whakawarea e ērā atu, ā, ka okeoke atu ia, na, ka oma atu. I te karanga atu a Aroha, “Koretake!” ki a rātou, ā, ka ngaro.

Ka tū ake ahau, ka tahitahi i ngā pūeru, ka tiki i te ringa o Aroha whakamākoha atu ai, ā, ka tahuri ki te teihana pahi. Ka whakatata mai tētahi tangata me aku mōhiti (i roto hoki i te kēhi i te taha o te kāmera). I te aroha mai ngā tāngata, engari ka taea te pēhea? Kua tūpono ngā mahi katoa i te tūrehutanga kanohi. I te tī noa a Aroha i te mataku me te riri, engari i te wherū ke au. Ahakoa tērā he taha koa tōku i rutua ai te tāhae tuatahi ki te papa. Koina te hanga kino o te rā!

Kei te whakaaro tonu mo te tokotoru rā. He taitamatāne, 17 rānei, 18 rānei te pakeke, he pai noa iho ngā pūeru. Kāore i tūkino mai, ko te kāmera anahe i hiahiatia ai. Kāore i tino moe inapō i te hurihuri o ngā whakaaro.

I taku ringa tonu te kēhi, me Chepe. Ka whiua atu te kēhi, ka haere ki te hoko i ngā tīkiti. Ka hoki atu ki te hōtera o aku whaea kōrero ai i te whānako. Ka mutu, ka hokona he kāmera hōu, ā, ka hoki ki tō māua hōtera. Ka hīrere horoia ai i aku tūnga, he rakunga noa iho. Ka tūtaki anō i ngā whaea ka peka atu ki te hapa. I runga i ngā tiriti ngā tini pepa, hurihuri noa. Ka pātai atu ki ngā kaitahitahi mo te take, ko tā rātou he tikanga argentino no te tau hōu. Ka pātai atu mehemea e hoha ana rāua, ka mea mai kāore, e rata ana rāua ki te tikanga!

I te 10:30 pm ka wehe atu aku whaea ki te taunga rererangi, ā, ka hoki māua ki te hōtera whakaaroaro ai i ngā tēnei ao rere kē e noho nei tātou!

Los difuntos - te hunga mate

2008-12-30T04:41:00.000-08:00

Kāore anō kia oho i te wā e tika ana kia parakuihi i te hōtera. Ka tūtaki māua i ōku whaea i el Café Valerio. Ka mutu, ka hoki tōku māmā ki te moe, i te māuiui tonu. Ka haere mātou ko Valerie ma raro ki te toa pukapuka, ko El Ateneo. He toa nui rawa atu i roto i tētahi teatro (whare whakaari) tawhito. Kua huri te atamira hei cafetería, ā, kei te wāhi nohonoho ngā pukapuka. I runga rā he pēita e iriiri ai ngā anahera i te tuanui.

Ka wehe atu a Aroha rāua ko Valerie ki ngā toa pūeru, ā, ka noho au ki te tirotiro haere. Ka hoki mai rāua ka peka atu mātou ki te kai. Ka ngata te hiakai, ka haere tonu ki Recoleta. He barrio tino pai, he maha ngā whare ātaahua, he Wīwī te hanga o te nuinga o ngā mea tawhito.

Ka kuhu atu ki roto o te urupā o Recoleta. He ao anō, me he tāone mo te hunga mate! He wharekōiwi nō terā whānau, nō tērā whānau. I roto i te nuinga he arapiki e heke ana ki raro i te whenua. He karāehe i roto i ngā kūaha e kitea atu ai ngā kāwhena. Ka aroha hoki ētahi o ngā wharekōiwi, kua mahue e te whānau. I reira hoki te takotoranga o Eva Perón. E hia kē ngā whakaahua i tangohia!

Ka hoki ki ngā hōtera. Ka hokona he kai mā tōku māmā, ka haere ai te toenga o mātou ki tētahi parilla (wharekai rorerore). Ka kī rawa te puku, ka hoki ki te moe. Me iti iho gte kai!

Más sorpresas

2008-12-29T04:57:00.000-08:00

Ka oho tōmuri anō i te ata nei, he tōmuri rawa mo te parakuihi o te hōtera. Engari he pai noa iho i te mea kua tino rata ki te wharekai o te koeko keke! Ka mutu te whakauru i ngā kōrero katoa ki te rātaka ipurangi, ka wehe atu ki San Telmo. He rongonui taua barrio nei mo te mākete taonga tawhito.

Ka haere ma raro ki te marae i mua i La Casa Rosada, ā, ka huri atu ki te tiriti La Defensa. Engari te ohorere! Mo te roanga o te tiriti, tae noa ki te mutunga o te tirohanga atu, kua huri hei mākete! Me te pai o ngā taputapu – he mea kiri kau, he kapu maté, he pēita, he aha, he aha! I reira hoki ngā kaiwhakaari (he pērā me te tangata mau hūtu).

Ka nui hoki ngā wharekai, na, ka peka atu māua ki tētahi ko La Raya te ingoa. I roto rā, he rite ki te tiriti, nō reira he papa kōhatu, ā, he mata toa i ngā pakitara. Ka puta ka uru atu ki roto i ngā toa. Ko tētahi i tino rata ai ko te toa waihanga. Te pai o aua mahi waihanga, ahakoa tīhāte, ahakoa tāre, ahakoa pouaka! He nui te utu o ngā taonga, engari he huarangi hoki.

Ka tae ake ki te plaza e hokona ai ngā taonga tawhito ka kite i tētahi tokorua e kanikani ana i te tango i waenganui i te tiriti. Ka tū ki te tangotango whakaahua i te pai o tā rāua kanikani.

Ka huri atu ki te rapu i te pāka taiao engari kāore i tae atu ahakoa te roa o te hīkoikoi. I te mutunga atu i hoki atu ki te hōtera o ōku whaea. I roto kē rāua i tō māua wharekai parakuihi. Kua māuiui tōku māmā, ā, ka hoatu i tana tīkiti mo te tanguería (he wāhi e whakaatu ai i te tango) ki a Aroha, me tana tohe ki te hoko ($150 Aotearoa!) i tētahi anō māku.

Kāore i te tino hiahia kia haere ki te whakaaturanga, te hē hoki o aku whakaaro. He rawe rawa atu te whakaaturanga. He pai rawa te kai i mua. Otirā ko ngā kaikanikani me ngā hunga pūoro me ngā kaiwaiata ngā whetū o te pō! Ka whakaaturia ngā momo tango – kanikani, pūoro, waiata – me te pūoro o ngā Andes (El Cóndor Pasa etc.), ā, ka tere te toto i aua waiata, ahakoa. Ko te mea tino pai rawa ko te kaikanikani gaucho (kaupoai argentino). Ko tētahi o ngā taputapu hei hopu i ngā hipi me ngā kau ko ngā mea e rite ana ki te poi, engari he mārō rawa (i te mea he kōhatu ngā poi ake!). Ka mīharo atu māua ko Aroha ki tōna kaha ki te karawhiu i aua boleadoras. Kei pōhēhē tātou i tō tātou rerenga kētanga!

Engari a Buenos Aires... he tokomaha atu ngā tāngata o La Ciudad de México, engari he tino tāone a Buenos Aires, na te nui pea o tōna pūtahitanga. Me ngā bonaerenses (ngā tāngata o Buenos Aires), he iwi motuhake.

El bullicio de Buenos Aires

2008-12-28T06:29:00.000-08:00

Koina a Buenos Aires! He tāone nui rawa atu, me ngā tiriti e toritori ana i te tini o te tangata, ahakoa tiriti whāiti, ahakoa tiriti whānui. Me te whānui hoki o aua tiriti whānui! He kaitā noa ngā whare, ahakoa te tawhito. Kāore he tohu o te horonga ohaoha o te tau 2002. Noho roa ngā tāngata i ngā cafeterías inu ai i te kawhe huarangi o Argentina, he medialunas (parāoa marama hotu - croissants). E rua ngā tiriti e rīpeka ana, ko Lavalle me Florida, mō ngā tāngata anahe. I te ahiahi ka whakatakoto te hunga hokohoko i ngā hīti e takoto ai ā rātou taputapu. Kei tāhaki ngā kaiwaiata me ngā kaikanikani. Kite ai hoki i ngā whakaminenga tangata e karapoti ana i ngā payasos (tāngata whakaari, whakakatakata). ¡Me encanta Buenos Aires!

Kei te noho māua i te Hotel Goya. Kāore pea he whetū (!), engari e tata ana ki ngā mea whakaihiihi. Inanahi i tae mai taku whaea me tōna teina i Iguasú. Ko te āhua nei i tino pai te terenga i San Francisco, hurihuri noa ki Río de Janeiro. Ka haere atu mātou katoa ki El Café Tortoni kai ai i te almuercito. He wharekai ātaahua i hangā i te tau 1858. Kātahi ka peka atu ki La Casa Rosada, te whare e noho ai la presidenta. Koina hoki te whare i tū ai a Juan rāua ko Eva Perón.

I te marae i mua i La Casa Rosada ka kitea te wāhi e hīkoikoi ai ngā wāhine kei te whakamaumahara i te iwi ki ngā tini desaparecidos de la guerra sucia (te hunga i ngaro i te 'pakanga paru'). Ka aroha hoki, los resultados de la dictadura.

I te ahiahi, ka noho taku whaea i tō rāua hōtera, i te ngenge noa, i te mamae hoki o te humu. Ka haere mātou ko tōku whaea kēkē, a Valerie, ki te mātakitaki i tētahi tanguera (he whakaaaturanga i te kanikani tango) i te tiriti. Ka ngenge ngā waewae ka peka atu ki te wharekai ko Broccolino para cenar. Ka hoki ki te hōtera i te 1:30 i te ata! Ā, la vida hispana...

Na, kua tae ki tēnei rā tonu. Kua oho tōmuri mo te parakuihi o te hōtera, nāwai rā ka haere atu ki te cafetería para desayunar (ko te koeko keke i whirihia ai!) me te tonu i ngā tini kōrero nei ki te rātaka ipurangi.

Colonia del Sacramento (24 – 26 de diciembre)

2008-12-28T06:17:00.000-08:00

Ka tae atu ki Colonia, ka haere tika ma runga tēkihi ki tō māua wharenoho, La Posada del Río. Te waimarie hoki, he rūma e wātea ana. Ka tika māua ki te hīrere, engari te paru o te wai i rere atu! Ka peka atu ki te tāone tina ai, ā, ka hoki ki te posada moe ai.

Ka oho hōu, ā, ka haere atu ki te wāhi e waea atu ai ma te Skype ki te whānau i Aotearoa. Kāore rawa tētahi wāhi i kitea. Nāwai rā ka mea tētahi kia haere atu ki te plaza, he wāhi waea kore, te plaza katoa! Ka noho ki te waea atu, ka kōrero atu ki a Ruakiri rātou ko Ngāti Pirihi, ā, ka haere koa atu ki te kimi wharekai.

Kua kī te mea tuatahi me te mea tuarua, ānō ko Hōhepa rāua ko Maria i te pō i mua i tērā atu Kirihimete. Kātahi ka tae ki tētahi, ehara te hanga i te tino pai engari i te wātea ngā tēpu o mua. Ka tonoa tētahi o ngā tēpu, ka mea te mesero (tūmau tamatāne), ‘No señor, tenemos mesas mejores por el otro lado en el jardín.’ (‘Kāo, e hoa, he tēpu ā mātou i tērā atu taha i te māra.’)

Ka whai atu māua i a ia ma te whare kia puta atu ki te māra. Engari te ātaahua o taua māra. He raiti huhua i roto i te rākau nei, ā, kei waho te awa e tere ana me ngā tini rama o Colonia e kapokapo ana – he ao tupua. He rawe te kai, he rawe hoki te waina.

Ka tata ki te tūruawēpō, ka pātai atu ki te mesera (tūmau wahine) mehemea e raruraru ana i te mahi i te pō nei, i te mea ko te Noche Buena (te pō i mua i te Kirihimete) te wā e tino nui ana ki ngā latinos. Ka mea mai ia he uaua māna, i te mea tokorua ana tamariki i te kāinga. Ka kōrero hoki māua mō ā māua tamariki tokotoru. Ka mea ia, ‘¡Ay, y aquí estamos!’ (‘Aī, kei konei kē tātou!’). Ka tae ki te tūruawēpō, ka kite i ngā tini mura kāpura e rere ake ana ki te rangi. Ka kimi atu i te mesera, ā, ka kite atu i a ia i te taha o te ahi e tangi ana mō āna tamariki. No te kitenga atu tīmata ai hoki māua ko Aroha ki te tangi! Ehara hoki i te mea ko mātou anahe. Ka haere mai te mesero ki te miri i taku pokohiwi. He iwi tino aroha te hunga latino. Ka wehe i te wharekai, ka awhiawhi i te wahine me te mihi ki te tamatāne.

Ka hoki ki te plaza, ka waea atu anō ki Aotearoa kōrero ai ki a Ngātarawāhi. I te mahi tonu a Tīaho. I reira māua i te plaza i Uruguay, i te 1:30 i te ata, i te pōuri, e noho ana i te uranga o te rorohiko, e kōrero ana ki tā māua tama i tāwāhi!

Ka oho i te ata, ka piki ki runga parakuihi ai. I te mea kua pau ngā moni katoa i te wharekai i te pō i mua, ko tā māua mahi ko te kimi cajero (mīhini moni) e tangohia ai ngā moni. Kāore taku kāri i whakaaetia. Te waimarie i whakaaetia ai te kāri crédito o Aroha, engari e 200 pesos uruguayos anahe, arā, e $14.50 Aotearoa! Ahakoa te cajero, kāore taku kāri i whakaaetia, na, ka mau te pōnānā! I muri i te wā roa i kitea te cajero nō tētahi atu hunga, no REDBROU, ā, ka whakaaetia. Kātahi te koa!

I te toenga o te wā i Colonia, ko tā māua mahi ko te hāereere i ngā tiriti marumaru o te wāhanga tawhito, i te taha hoki o te awa, ā, ko te kai i ngā wharekai pai rawa atu. Ka peka atu ki te whare karakia tawhito, nā ngā Portugueses i hanga. Otirā, i roto kua hangaia te ‘ana’ mo te Kirihimete i roto i tētahi o ngā rūma ki tāhaki. Kua whakamahia te pepa parauri kia rite ai ki te kōhatu, ā, he pākoro anō, he pākoro anō e kitea ai ngā āhuatanga o te whānautanga o Ihu Karaiti.

I tēnei wāhanga o te ao ka nui ngā tauira o te te whānau tapu, engari kāore te pēpi Karaiti e whakatakotoria tae noa ki te Noche Buena, arā, te tūruawēpō o te 24 o Tīhema, hei tohu i tōna whānautanga.

I te ahiahi o te 26 o Tīhema, o te rangi i 52 ōku tau (viejo, calvo, gordo – ¡ay, ay, ay!), ka eke anō i te waka hoki atu ai ki Argentina. Ka nui tonu aku mihi ki Colonia, koina tētahi o ngā tino wāhi i tae ai māua ko Aroha!

El tren terrible

2008-12-28T06:07:00.000-08:00

Kotahi tekau mā rima hāora, koina te roa!

Ka tae atu ki te teihana, ka kite atu i ngā wākena hakataka o te tereina ka mōhio ai ki te hē o ngā whakaaro. Ka eke ki runga – auē! He wini pakaru, kāore hoki ētahi e kati rānei, e huaki rānei. Me ngā tini tuhituhinga i runga i ngā pakitara!

Ka noho ki ō māua tūru. Ka tūtaki i tētahi tangata no Chile. Ko te āhua nei, he rerenga no te wā i a Pinochet. Hei hoa kōrerorero mo te haerenga. Ka wehe te tereina, ka tau haere ngā whakaaro. He rawe te tōanga o te rā i waho, i runga i te whenua papatahi o La Pampa.

I te taha o te ara tereina he rori motukā, he rori puehu. Koina, he tika tāu! Nāwai rā ka kī te tereina i te puehu. Ka mārō rawa ngā makawe, ka kī te ihu me ngā taringa. I a Aroha he pepa horoi mākū. Ina murua te kanohi ka paru rawa te pepa.

Me te moe – ¡imposible! Kāore ngā rama i weto, he tāngata hoki e kōrerorero ana mo te pō katoa. He maha hoki ngā tūranga tereina, e heke ai, e eke ai ngā tāngata. Ka tautohetohe mō ngā tūru, ā, me noho tahi māua i te tūru whāiti i matangurunguru ai te tou.

Ko te kīnaki (!), ko te wharepaku. Kāore he heketua, he pūare noa iho, me ngā tapuwae rino e rua e koromeke ai te tangata. Taku waimarie kāore i te hiatiko. Engari, i te mea kāore te kūaha e kati tika, me tū me tētahi waewae kei te kūaha me tērā atu e tae ai te mimi ki te rua kei tawhiti. He mea whakamā te whākī atu, kāore ngā mimi katoa i tae atu ki te pūare, engari ehara au i te tangata tuatahi i hē ai. Ko ngā tohu kei ngā pakitara, me te haunga, me te hōpua kōwhai e teretere ana i te nekehanga o te tereina.

Kotahi anahe te mea pai o te tereina, ko te kawhe, bueno, estamos en Argentina.

Ka tae ohere, ka tae paru, ka tae amuamu ki Buenos Aires. Ka whakawhiti i te tereina ki te subte (metro), ā, ka tae atu ki te teihana Lavalle. Ka piki ki runga, ka puta ki tētahi o ngā tiriti apiapi rawa o Buenos Aires. Me te maha o ngā whare rakurangi! Ka noho ki te parakuihi i te taha o Juan (el amigo chileno). Ka mutu, ka poroporoaki i a Juan (engari kāore i mua i te kōrero hamu – i a Aroha i te wharepaku), ā, ka haere mā raro ki te wāpu Buquebus, me te maleta (tūeke) e takatakataka ana!

Ka hokona ngā tikiti, ka eke i te peripoti, ā, ka whakawhiti atu ki ... Uruguay!

Bahía Blanca

2008-12-28T05:59:00.000-08:00

Ehara rawa i te pō e whakaau te moe. I te mea he tangata au e moe ai i runga i te puku, es casi imposible dormir i runga i te tūru. Me te mea hoki, i te tūruawēpō tīmata ai tētahi pikitia hoihoi rawa atu! Te waimarie o Aroha, ahakoa te mahi a te mataraumati. Ka tae ohere mai māua ki Bahía Blanca.

Mai te taenga atu, ka rata au ki te tāone o Bahía Blanca. Kei te nuinga o ngā tiriti he rārangi rākau e whakamarumaru ana i te ara hīkoi. Ko te nuinga o ngā whare nō tērā atu rautau. Engari aku wawata mō tērā whare, mō tērā whare! Ka noho mātou i te Hotel Múñiz, he hotera tawhito, engari he pai rawa. Titiro atu ai i tō māua rūma ki te plaza me ngā whare rangatira e karapoti atu ana. E rua ngā pō i reira. Ahakoa ehara te wharekai tuatahi i te tino pai, he tino pai ērā atu. Me te hoihoi o roto! He iwi e rata ana ki te kai me te inu kawhe mō ngā hāora e hia kē!

Ka peka atu ki te whare pukapuka titiro ai. Ahakoa kāore i īnoi atu ka haere mai tētahi wahine ki te ārahi i a mātou ki ngā wāhanga katoa o taua whare. Koina te marae o te iwi nei.

Ko te tikanga, i te haere atu ki te taha o te Atlántico inaina ai i te one, engari i te taenga atu ki te teihana tereina, ka huri ngā whakaaro kia haere tika ki Buenos Aires. Engari te pōhēhētanga ko tērā....

Tutū te puehu (20 de diciembre)

2008-12-28T05:50:00.000-08:00

I tēnei wā tonu kei te noho au i te teihana pahi o Neuquén i Argentina. Kua haere a Aroha ki te rapu i te tohu autō. Koina tana mahi i ia wāhi hōu, i ia wāhi hōu. Kāore e roa kāore te pouaka makariri e kitea atu!

Inapō i haere māua ko Aroha i te taha o Sabine rāua ko tāna tamāhine ko Bettina ki te hapa i Pura Carne. Koina te wā tuarua i tae ai ki reira kai ai i taua rā! Ka hoki ki te kāinga ka waea atu ki a Ruakiri rāua ko Tīaho. Ko tā Ruakiri kua iti te mahi i te recesión. I te whakaaro ia ki te mahi māra. Otirā kua hipa te wā onoono. Kāore a Ngātarawāhi i reira, ko te tūmanako ka whakapā atu ki a ia hei te Kirihimete.

Kāore māua i tino moe i te pō, i te poto o te wā, i te matakū kei kore te karaka e tangi, i te whakaaroaro mō ngā tamariki, i te hoihoi hoki i waho. Kīhai rawa i roa, ka tangi te karaka, ā, ka maranga. Ka haere ma runga tēkihi ki el rodoviario (te teihana pahi), ā, ka eke i te pahi Andesmar ki Neuquén.

I te kōpatapata i te wā i wehe mai ai, ā, ka kino haere te rā, tae noa ki te rohe o Chile me Argentina. Ka haere ma te takiwā o Lonquimay. Koina te papakāinga o te kaitiaki o te Colegio Scole Creare, o Andrés. Ko tāna, kāore anō te tangata kia tae ki Chile mehemea kāore anō kia tae ki Lonquimay! Ahakoa tāna, he ātaahua te takiwā. Ka nui ngā awa, he haumako te whenua, he maunga teitei huri noa (me ētahi maunga puia increíbles).

I te mea kua kore te rerewē ki Lonquimay kua riro te ana tereina i te huarahi motukā. He mea anga tahi, he roa rawa hoki. Ko tāku hoki ko te whai i te makenu o te ara tereina. Koina tētahi mahi tino pai ki a au i a au e tamariki ana, especialmente tō te huarahi tawhito i te mato Fraser i Kānata. Ahakoa ka pakeke te tangata, ka rite tonu ki tōna hanga tamariki!

Ka taha atu i Lonquimay, ka rere kē rawa te whenua. Ka maroke rawa atu, ā, ka iti ngā rākau, haunga ngā pehuenes (araucarias). Ka mīharo tonu ki aua rākau rā nō tua whakarere. Ka tata ki te tāwhatitanga o Pino Hachado (‘te paina i topea’) i ngā Andes ka tae ki te aduana chilena (te tari rohe o Chile). Kāore rātou i aro ki ngā uruwhenua o Aotearoa, ko te kāri chileno anahe te mea i te hiahiatia. E kī rā! Ka piki ki runga ki te tāwhatitanga, ka heke ki te aduana argentina. Koina hoki tā rātou!

Koina hoki te wāhi i tangohia ai te whakaahua o te hiwi me ngā tini rākau pehuén. He rawe, ne?

Ka heke ki raro rawa kua papatahi rawa te whenua, ahakoa te anganga atu! Kitekite atu ai i ngā tūāhu Mapuche i te taha o te rori, mōhiotia ai ki ngā tini weru whero e kapakapa ana i te hau. Ka kite hoki i ngā tuhinga ‘Resistencia Lautaro’, he rōpū whakahuri nō ngā Mapuche. Ko Lautaro te rangatira Mapuche i pana i ngā Pāniora i te rohe Mapuche.

Ina mate tētahi i te rori, ka whakatū tōna whānau i tētahi wharekarakia iti rawa i te taha o te rori, me te ingoa i ētahi wā, arā ‘Difunto Vásquez’ (‘He mate no te whānau Vásquez’). I kitea tētahi me te kitā whakairo nui i te taha! Kāore e kore i te rata rawa te tangata i mate ki te whakatangitangi.

Ahakoa kua kore ngā kapua, kua kino kē te rangi, pūehuehu noa! Ka tae ki Neuquén, ka kino rawa atu. Nāwai rā kua pura ngā karu, kua mārō ngā makawe i te puehu. Me te kaha o te hau! Ka kuhu i te teihana, ka tika ki te pātaka pahi hoko ai i ngā tīkiti e puta ai!

I te mea me tatari kia rima hāora mo te pahi ka haere māua ki te pūtahitanga o te tāone. Engari te kaha o te hau me te nui o te puehu, he rite ki Baghdad! I ētahi wā me huna i ngā roro toa i te kino o te hau me te mamae o ngā karu. Ka peka atu ki te wharekai kai ai, huna ai hoki i te puehu! I te kī te wharekai i ngā tāngata e mātakitaki ana i te kēmu poiwhana. Ina whai piro, ka pahū te wharekai i te hāmana me te auē a te hunga rā. Kātahi anō ka kite atu i te hunga e pērā ana te whakamomori ki te tākaro! Ka mutu te kai, kua heke te hau, ā, ka hoki ki konei, ki te teihana tatari ai i te pahi ki Bahía Blanca. Ka wehe i te 22:30 (10:30 pm), ā, ka tae a te 7:30 am. He pō roa kei mua i a māua! Mehemea ko te ‘pō whakaau te moe’ ka pai hoki!

La semana en Temuco

2008-12-28T05:46:00.000-08:00

Koinei te wiki whakamutunga o te kura, engari... kāore au i tae atu! I tae atu a Aroha i te Rātoru kia kite i ngā ākonga e tākarokaro ana i waho (mo te rangi katoa). Engari tōku kino. Otiia, ka nui ngā akoranga Pāniora i te taha o Rossana (tirohia te whakaahua). Kua tīmata hoki te hīkoikoi i te ata i te ara paihikara. Me tūpato kei hoki mōmona rawa ki Aotearoa, te kino o taku āhua!

Ka tae mai hoki a Sabine rāua ko tāna tamāhine, a Bettina, noho ai mo te wiki whakaotioti ai i ngā nama. Ka utu hoki māua i ngā nama kia rite ai mo te hararei tuarua – te haerenga roa ki Argentina! Ka kai hoki i te taha o te whānau Sade Solar i tō rātou kāinga, i tō Quemel rāua ko Viviana taha hoki i Lola.

El regreso al sur (11 - 14 de diciembre)

2008-12-28T05:35:00.000-08:00

Ka oho i te ata, ka hoki atu ki Pucón parakuihi ai. Ka mutu ka peka atu ki te mākete. Engari a Troels rāua ko Tamsin! E hia kē ngā mea i hokona? Kua kuhu atu au ki te toa pukapuka, ā, ka kitea te pukapuka África na Leni Riefenstahl. Ka hokona i te pai o te utu. Engari te taumaha – me pēhea rā e haria atu ai ki Aotearoa?

Ka mutu te hokohoko, ka hoki atu ki te huarahi matua ki te tonga. Ka tina i Río Bueno, ā, ka haere tonu ki Frutillar i te taha o te roto ko Llanquihue. Ka kitea tētahi hōtera tino pai, me te tirohanga atu i ngā rūma – ¡increíble!

Ka meatia e te wahine kia haere atu ki te Club Alemán (Karapu Tiamana) hapa ai. Ahakoa te pai o te tirohanga atu, ehara te kai i te tino pai.

I te ata i muri, ka hari atu a Tamsin rāua ko Troels ki te taunga rererangi i Puerto Montt. He hararei tino pai tō mātou. Ahakoa he kawa kē tō Troels, he pai rawa te kite i te harakoa o Tamsin. Engari te mahi whaiāipo!

Ka hoki tika māua ko Aroha ki Frutillar moe ai i te siesta. Ka oho ka haere atu ki te kai. Kāore hoki te kai i tino pai i tēnei wā, ahakoa te ātaahua o te tirohanga atu!

I te rangi i whai atu, i te Rāhoroi, ka tahuri ki te karapoti i te roto o Llanquihue. Engari te rawe o taua haerenga nei. Kei pōhēhē ko Aotearoa te mutunga mai o ngā whenua mo te pai o ngā hanga whenua. Ko ngā pāmu, me ngā ngahere, me ngā maunga i kite ai māua i taua rā, koina te mutunga mai o te pai! Te haumako o te whenua, te teitei o ngā maunga, te rahi me te mārama o Llanquihue. Me ngā whare hanga alemán! Na, kei runga rawa ko te maunga puia o Osorno e tare ana, ¡espectacular!

I tua atu o te kāinga iti o Cascadas, ka peka atu ki te kauhoe. Te mārama o te wai e harawene ai a Taupō! Me ngā rākau kei tāhaki, he ōrite ki ō Aotearoa. Kei reira hoki ngā tini kōwhai e tuputupu ana.

Ka tae atu ki Ensenada, ka peka atu ki te wharekai Don Salmón. Ko taua hanga anō, ehara te kai i te tino pai, hāunga ngā ensaladas me te pebre (he kīnaki mahi a ki te hāniana, te tōmato, te chile, te cilantro). Ka hoki ma Puerto Vara ki Frutillar.

Na, ka tae ki te Rātapu. Ka parakuihi, ka peka atu ki te ngahere tirotiro ai, engari, i muri i te rori kōpikopiko, ka tae ki te kēti me te tohu e mea ana kua kati. He uaua te whakahuri i El Tanque. Otirā, ka puta, ka hoki atu ki Temuco. Kua mutu pai te hararei tuatahi.

En el hogar (9 & 10 de diciembre)

2008-12-28T05:26:00.000-08:00

Engari te pai o te oho i tō māua moenga ake! Kua tino tau te noho ki Temuco. Otirā, kāore mātou i tino puta, he wā kē hei whakatā, hei tuku karere. Ka kōrerorero hoki māua ko Tamsin mo te pukapuka.

Ko tētahi o ngā tino mahi ko te whāngai i ngā manuhiri ki ngā empanadas a Luisa. Na te maha i pau i mōhiotia ai te reka. Ahakoa te nui o te almuerzo, ka puta i te pō rā, ā, ka haere ma raro ki te wharekai Lola, kai ai i te asado criollo, arā, ko ngā kaokao kau ka āta tunua i runga i te wahie mō ngā hāora e whā! Te mutunga mai o te reka. I muri i ngā pisco sours e rua, me te waina tino pai, kua kaha rawa a Tamsin ki te katakata. Te waimarie nō mātou i hīkoi ai, ā, ka tae tika ki te kāinga.

I te rangi i muri mai ka whāngaia mātou ki te pollo arverjado a Luisa. Kua mahia te hupa heihei mā Troels i te mea i te raruraru tana puku i te rerenga kētanga o te kai (me te nui o te mīti). Ka peka atu a Aroha mā ki te mākete. Ka hoki mai ka wehe atu ki Pucón.

Ka noho mātou ki las Cabañas Playa Linda (i waenganui i Villarica me Pucón), he pai rawa tō māua kāuta, he rawe hoki te wāhi. Ka tau te noho, ka taraiwa atu ki te maunga puia o Villarica. Engari te pai o te tirohanga atu ki te roto me ngā maunga kē atu. I te tino rata a Troels ki ngā hanga maunga puia o Chile.

Ka heke i te maunga, ka taraiwa tonu ki Pucón rapu ai i te wharekai! Engari te pai o te kai i taua pō, me te waina hoki! Ka hoki ki te kāuta moe ai...

El poder español (8 de diciembre)

2008-12-27T05:54:00.000-08:00

I te ata ka kuhu au i taku tarau poto, i taku tīhāte, i ōku hū omaoma (!), ā, ka hīkoikoi haere i te taha o te awa. Koina te wā tuatahi mo te wā roa – engari te pai!

Ka hoki atu ki te hōtera, kua kai kē ngā hoa nō reira ka whawhao i ngā pēke, ka utaina ki runga i El Tanque, ā, ka hīkoi atu ki te mākete. He tino pai ki a au te mākete o Valdivia – ko ngā tini momo ika, ko ngā kaimoana e hia kē, ā, kei te taha ngā lobos marinos me ngā pelícanos e tatari ana i ngā hukenga. Kārangaranga ana ngā tāngata, e ngengere ana ngā kekeno, e tīwē ana ngā manu. Te rawe hoki!

Kīhai i roa (e kore rawa e roa!), ka whakatata mai tētahi tangata e pātaritari ana i te tangata kia eke ki runga i tana waka tirotiro haere ai. Otirā, he pai te utu nā reira i whakaae atu ai. Ka piki ki La Plaza de Armas por un rato, ā, ka hoko kawhe, ā, ka hoki ki te wāpu eke ai ki runga i te waka.

Tō mātou waimarie hoki! He rawe te terenga i runga i te waka. He tino matatau te kaiārahi, he tino tere hoki ngā kaimahi. I ratongia mātou ki te pisco sour, ki te kai nui (salmón), ki te pūrini, ā, i te ahiahi rānō ki te kawhe me te hanawiti.

Ka teretere haere i runga i ngā awa e toru o Valdivia, arā, ko te Calle Calle, ko te Caú Caú, ko te Río Cruces. Hei te pūtahitanga karangia ai te awa ko te Valdivia. Ka nui ngā momo manu i kitea, ko te wāna pane pango tētahi, ānō kua toro iho te pane me te kakī ki roto i te mimiha! He mā te toenga o te tinana.

Ka whai te waka i te awa tae noa ki te waha. I reira ngā pā tūwatawata e whā a ngā Pāniora. Kua tae kē māua ko Aroha ki te pā o Niebla i te taha o Quemel mā. I tēnei wā, ka mātua peka atu ki te moutere ko Mancera. I whakaingoatia mo don Pedro Álvarez de Toledo y Leiva, marqués de Mancera (c1585-1654). Ko ia te virrey (māngai kīngi) o Perū (he wāhanga a Chile no te virreinato de Perú). Ko San Pedro de Alcántara te ingoa o te fortaleza (pā tūwatawata) ake. He ngāwari te wawata mo te wā i a rātou, i ngā Paniora. I hangaia hoki ngā pā i te mea kua kaha ngā Tatimana i taua takiwā. E kī rā, me haere ki tērā taha o te ao pakanga ai i ngā tāngata noho tata! Otirā, he rawe te kāinga iti i te taha o te pā, me ngā cerezos (rākau tiere) e kī ana i te hua!

Ka haere mātou i reira ki Corral. Ka piki māua ko Troels ki te fortaleza, engari ka haere kē a Aroha rāua ko Tamsin ki te mākete. Ehara māku hei kī atu! Ka āta hoki atu ki te tāone. Ka whakaaturia mai ngā tohu o te maremoto (parawhenuamea) o te tau 1960, he wāhanga no te rūwhenua nui rawa o te ao – 9.5 i te tāhei Richter!

Ka hoki ki uta, ka ekengia El Tanque, ā, ka tere atu ki Temuco. Ka poto te whakatā, ka haere ma raro ki te rapu wharekai. I te tōmuritanga kua kati a Pura Carne, ā, ka haere atu ki te pūtahitanga, ā, ka tae atu ki te wharekai Rapanui. Ka mutu, ka hoki ki te moe.

Kātahi te rangi pai!

La naturaleza de la costa

2008-12-23T04:55:00.000-08:00

Ka oho i te ata i tō mātou whare noho, i Las Cabañas Pleno Centro, kia kite kāore he hiko. Kāore he hiko i te tāone katoa! Nā reira i hoko ai i ngā kai me te miraka mahana (!) hei parakuihi.

Ka wehe i Castro, ka hoki atu ki Ancud, ā, ka haere i reira ki te tai hauāuru, ki Te Moana-nui-a-Kiwa. Ka tae ki te tāone iti rawa o Puñihuil. Kei reira ētahi whare hararei, ētahi wharekai me ngā tini kaiārahi e hiahia ana kia eke ngā tāngata ki runga i ō rātou poti. Ko te take, he pingüinera (wāhi kōhanga karora).

Ka mātua haere ki tētahi o ngā wharekai kai ai i ngā empanadas de locos (pāi pāua), he reka. Ka mutu, ka heke ki tētahi o ngā rōpū harihari tūruhi, ā, ka haere atu ki te wai eke ai i te waka. I te tuatahi ka titiro ki ngā karora Magallanes (‘Magellan’ en inglés), kātahi ka whakawhiti atu ki te moutere e noho ai ngā karora Humboldt. He Haponihi rawa tō māua hanga ko Troels, e tangotango ana i ngā tini whakaahua.

Ehara i te mea, he karora anahe. I reira hoki ko ngā kūihi moana, ko ngā kawau, ko ngā karoro ... ko ngā nutria (ota). I te āta whai te waka i te nutria e ngana ana ki te kai i te pāpaka nui. Ka hurihuri haere i te wai e karo ana i ngā maikuku nui o te pāpaka. I te mutunga ake i totohu te pāpaka ki te papa o te moana!

Ka kōrerorero māua ko te kaiurungi mō ngā manu. He tāngata māhaki, engari he nui tōna aroha ki te moana me ōna manu. Ka tohu atu ki tētahi rakiraki rere kore. He ririki noa ngā paihau, ā, ko tā te rakiraki ko te omaoma haere i te kahu o te moana! Me tāna, he tere rawa te oma. Nāku te whakataukī, ‘Ka rere te kawau’, i whakamārama atu, ā, ka kata noa. Ko tāna, ka kōrerohia atu ki ngā tūruhi a muri ake nei!

Ka hoki ki uta, ka au i te wai mārama, ā, ka hoki atu ki Ancud. Ka kai i te hōtera nui o reira, engari, he pērā me te nuinga o te hōtera pērā (nō ngā tau 1970), ehara te kai i te tino pai. Ka mutu, ka haere tonu ki te peripoti whakawhiti atu ai ki tuawhenua.

Ka tere te haere ki te raki, ki Valdivia, ā, ka peka atu ki te hōtera i noho ai māua ko Aroha i te Akuhata. Ahakoa ko te raumati kua heke te utu! Ka rite, ka hīkoi atu ki te tāone i te taha o te awa. Engari ngā karu o Troels i te wā i kite ai i ngā lobos marinos gigantes (kekeno nunui) e noho ana i te taha o te ara hīkoi. Ahakoa aku kōrero ki a ia i a mātou i Chiloé, kāore i aro mai!

Ka peka atu ki te wharekai cena ai. Kua tata hemo a Tamsin i te hiamoe, ānō he pononga hiko sin pilas (kāore he pūhiko)!

El viaje continua (5 y 6 de diciembre)

2008-12-16T14:46:00.000-08:00

Ka oho moata, mehemea he moata te 8:00 am! Ka wehe atu i Puerto Montt, ā, ka haere ki Pargua tae atu ai ki te peripoti. I mua tonu i te taenga atu ka peka atu ki te kai parakuihi. Ka kai i ngā hēki kōrorirori me te tīhi, engari na te kaha o te tīhi i kino ai te kai. Ko te kawhe ko te Nescafé. Ā, kia hoki atu ki te kawhe o Aotearoa! Wawata ai au i ngā café plano blanco...

Ka eke ki runga i te peripoti, ā, ka tere atu i runga i te moana marino ki te moutere o Chiloé. I a mātou e whakawhiti atu ana kite atu ai i ngā pelícanos me ngā lobos marinos (wūruhi moana – kekeno). Ka ū ki Chacao, ka haere tonu ki te tāone o Ancud. Ka piki ki El Fuerte San Antonio, ki te pā whakamutunga i tau ai ngā Pāniora i Chile. No te tau 1826 i wehe atu ai.

Ka heke anō ki te tāone, ki te whare kai Kurantón. Koina te wāhi rongonui o Ancud mo te kai curanto, koina te hāngi o Chiloé. Ka tunua ki roto i te kōhua nui i roto i te whenua. Engari te nui o ngā pereti i tae ki te tēpu – papas cocidas (rīwai kōhua), milcao (rīwai maoa me te rīwai mata), chapalele (rīwai maoa me te parāoa puehu), longanizas (notinoti), pollo (heihei), carne (mīti), cholgas (kuku), almejas (tuangi), arvejas (pī), porotos (pīni). Me te reka hoki o te wairanu! He aha anō i te taha? Koina, he pisco sours!

Ka puta puku tenga ki waho, ā, ka hōnekeneke atu ki el Tanque. Ka taraiwa i Ancud ki Delcahue, ā, ka whakawhiti atu ki te moutere iti o Quinchao ma runga peripoti. Ka tau ki te whare noho i te tāone o Achao, ka haere ma raro ki te wāpu. Te pai o te ahiahi! Kāore he kapua, he rawe te matangi, he ātaahua te moana i waho... he paru rawa te tahatika! I te whiu noa ngā kaihī me ngā kaihao i ngā hukenga ika ki te wai. I reira hoki ngā tamariki e kau ana!

I te ata i muri i haere atu ki te tirotiro ki te whare karakia. He rongonui ngā whare karakia o Chiloé. Hangaia ai ki te rākau, ka nui ngā mahi whakapaipai o roto. Me te pai o te wairua! Ka mutu, ka haere tonu ki te pito o te moutere, hīkoikoi ai i te taha o te moana. Ka kite i te whare e tika ana mōku me ngā pukapuka.

Ka hoki ki te moutere o Chiloé, ka taraiwa atu ki te tāone matua o reira, ki Castro. He tino pai te hanga o te tāone, he rawe rawa atu te hanga o te whare karakia. Engari te pai o ngā pakitara me te tuanui rākau o roto! Ka haere atu ki te miha, koina te wā tuatahi i Chile. Ko te kai o te pō, he pescado (ika) me ngā ... pisco sours.

Un lago increíble (el 4 de diciembre)

2008-12-16T07:37:00.000-08:00

Ka oho i te ata, ka konihi atu ki te wharepaku. Me haere ma te rūma moe o Tamsin rāua ko Troels! Koina te pai o El Hostal Vista Hermosa! Ka rite, ka heke ki te pūtahitanga o Puerto Montt rapu ai i te parakuihi. Kia tae atu ki La Plaza de Armas (te marae matua o te tāone) kua pai te hanga. He rangi ātaahua, ā, he pai te tirohanga atu ki te moana ki te tonga.

Ka hīkoi atu ki te barrio de Angelmo. He tiriti roa rawa e tūtū ana ngā tini pātaka hokohoko. He rawe ā rātou taonga – he mea whatu, he rākau whakairo, he pūeru. Kei te pito he mākete kaimoana. Te nui o ngā momo mātaitai. Ka hokona te hāmana pāwhara.

Ka hoki whaka te pūtahitanga ka peka atu ki te wharekai almorzar ai. Te reka o ā mātou kai – pisco sours, merluza (uturi), jaiva (pāpaka), congrio (hokarari), locos (pāua!), sopaipillas (parāoa parai). Kua waia pai ngā hoa ki te kai chilena. I te hokinga ki te hostal ka hoko a Troels i te hāte e mau ana te hanga o tētahi Selk’nam no La Tierra del Fuego, he tāne tahanga e whakaari ana i te wairua kino i te wā o ngā mahi whakatāne. Ki a au nei, he mahi poka noa te mau hāte pērā, ina kūware ki te iwi. Kei runga te whakaahua i hoaina ai te pikitia i runga i tana hāte.

I te ahiahi i taraiwa atu ki te roto o Llanquihue. He rite ki a Taupō te hanga, engari huri noa he maunga puia – ko Osorno, ko Puntiagudo, ko Calbuco. He maunga whakamīharo, no más. Me te mārama o te wai. Ka haere tonu i reira ki tētahi atu roto, ko Petrohué te ingoa. Me kī, he awaawa waipuke. Huri noa ngā maunga teitei e tare iho ana. Kei pōhēhētia kei tētahi o ngā roto o Te Moana Pounamu!

Ko te maunga puia, ko Osorno te mea ātaahua rawa. He koeko pū te hanga, ā, ka tū i mua i ngā roto ānō ko ia te rangatira o ngā rangatira. He whenua ātaahua rawa a Chile! Titiro ki te whitiata nei no Petrohué:

Un viaje con amigos

2008-12-15T05:42:00.000-08:00

Kua hoki māua ko Aroha ki Temuco. Kia rima anō ngā rā ka haere atu ki Argentina. Engari i hea māua i ngā rangi i hipa atu nei?

I te Wenerei, i te 3 o Tīhema, ka wehe atu māua ki te tonga ma runga i El Tanque, i te Jeep Cherokee i tukuna mai e te rangatira o te whare pākoro. Engari te pai o te taraiwa! 120 kiromita i te hāora te tere i runga i te rori matua (Ruta 5) – he rawe! Kei El Tanque te control cruise, hei reira ngāwari ai te taraiwa, kāore te waewae e mamae.

Ka tae atu ki Puerto Montt, kia 320 kiromita ki te tonga, ka kimi haere i te whare noho. I muri i te tautohetohe haere mo te mapi ka tae atu. I runga i tētahi hiwi i te taha o te teihana carabinero (pihimana). Ko te ‘Hostal Vista Hermosa’ te ingoa, arā, ko te whare noho me te tirohanga pai. Koina anahe te hanga pai o taua whare rā! Otirā he wahine pai te rangatira.

Ka waiho i ngā pēke, ka haere atu ki te taunga rererangi tūtaki atu ai i ngā hoa. Kua roa a Tamsin e rangahau ana i ngā tikanga Tātai o Te Koutu. No Ahitereiria ia, ā, no Tanamāka tōna hoa tāne a Troels. Ka hoki atu mātou katoa ki te whare noho. Ka aroha hoki ngā hoa! Ka ohorere i te hanga ao tuatoru o Puerto Montt me tō te whare noho!

Heoti, i te hiahia māua ko Aroha kia ako a Tamsin rāua ko Troels ki te pai o te kai chilena, ahakoa tō rāua ngenge i te roa o ngā rerenga. Ka haere atu ki te tāone tūtata o Pelluco. Ka tae atu ki te wharekai El Fogón de Cotelé. Ko te tangata whakaū waka he ruatanga tangata noa iho. Kāore ōna waewae, ānō ka mutu atu te tinana i raro tonu i te puku! Ka nukunuku haere me ngā poraka kei ngā ringa. Koina te wā tuatahi i kite ai a Tamsin mā i ngā tāngata pērā. Kua waia māua ko Aroha i ngā tini haerenga ki México. Ka tango whakaahua a Troels i a māua ko taua tangata rā engari kāore te whakaahua i puta pai.

He paku te wharekai, he tēpu e taka ana i te ahi matiti. Hei tīmatanga he pisco sours. Ka rata atu rāua! Ka haria mai te mīti kia whirihia atu ngā tapahanga. Ka ohorere rawa rāua i te rahi o te mīti i whirihia. Engari te kanohi o Troels i te ngaunga tuatahi i te mīti! Ko tāna, kātahi anō ka kai i te mīti e pērā ana te pai. Ka pai, e Chile! Me te waina, ka nui ngā mihi! Ka hoki ngata rawa ki te whare noho!

Hace calor, hace mucho calor

2008-12-01T13:15:00.000-08:00

Āna, he wera, he tino wera! Kei konei au e noho ana i te rūma noho, he wai mirumiru, he tiere kei te taha. Kāore he hāte engari he tāora e iri ana i te tūru roa kei heke te werawera i te rera. Ahakoa te pai o te tūru kiri kau (me te nui o te utu), ka kino i te rangi e pēnei ana te wera! Kei te pouaka tio hoki te pia Calafate e makariri ana...

I te ata nei kua mākū pai ngā kēkē i mua i te taenga atu ki te tūranga tēkihi, e whā noa iho ngā poraka! Ka kī te tēkihi i taku ekenga atu. Na tōku āwangawanga kei haunga aua kēkē i pākaru mai ai te werawera, ā, kīhai i roa kua mākū hoki te rae me te tuarā! Te waimarie i tae maroke au ki te kura.

Ka uaua hoki te whakatau i ngā ākonga i te wera. Kua korikori, kua kaparangi i ngā akomanga iti rawa. Ka hoki ki te kāinga ānō e kā ana ōku tōkena i te ahi! Almorzamos (Ka tina) ka hoki atu ki te whare wānanga mo te akoranga Pāniora ma runga colectivo (tēkihi rau pāhehe).

Ka mutu te akoranga ka hoki mai ma raro. Kātahi anō ka rongo i te ngau a te rā - hū! tōna kaha! Chuta! Ka peke atu ki te toa Santa Isabel hoko ai i te pisco me ngā cerveza (pia). He uaua rawa te taha atu i ngā puestos de frutas (pātaka huarākau). Hōpurupuru rawa ana ngā hua i te wera. Engari te kakara o ngā rōpere, o ngā tiere, o ngā āpirikoti, o ngā pītiti! No te wiki tonu nei puta ake ai ngā tiere kōwhai. Acá eso tipo se llama cereza paloma, kei konei huaina ai taua momo ko ngā tiere kūkupa.

Ka tae ki te kāinga, ka tangohia māngongetia ngā pūeru, ka oma atu ki te hīrere, ā, te pai o te wai makariri!

Nō reira, kei konei ahau e noho ana... Engari kāore rawa koutou e kite atu i a au e hāte-kore ana. Kua nui rawa te puku i la comida chilena! Tēnā, pēhia te whakaahua kia kite pai ai i ngā tiere.

Teletón

2008-11-29T06:46:00.000-08:00

Engari he momo rere kē ko tātou te tangata! Kātahi anō ka mutu ngā mahi kōhuru a ngā fanáticos i Īnia, na, ka tīmata i Chile nei el Teletón. Kua 30 tau a Teletón i te whenua nei, engari he ōrite te kaupapa i ia tau, i ia tau, arā, ko te hunga hauā. Kīhai i roa i waea ki te pātere ‘veinticuatro mil, quinientos, raya, cero tres’ (25.500-03).

I tīmata inapō i te tekau karaka i Santiago. I reira te Perehitini me ngā minita katoa o te Kāwanatanga. Ko te kaiwaiata tuatahi ko Pedro Fernández de México! Ka heke māua ki te moe, ka rongo tonu i te hoihoi e ngahoa mai ana i la Plaza de Armas. Na te ngenge i tau ai ki te whare, engari i te rā nei ka haere atu. [Kei runga e rua ngā whakaahua i tangohia i te rā nei.]

I ia hāwhe hāora, i ia hāwhe hāora whakaaturia ai te whitiata o tētahi tamaiti hauā – tōna hītori, āna mahi, ōna mātua. Ahakoa ngā mea mīharo, ka nui hoki ngā hanga pōuri. Ka tangi te tamaiti, ka tangi ōna mātua, ka tangi hoki māua – te hoha hoki! Whakatangihia ai he pūoro terrible, e hiahia ana ki te pupuhi i te pianista me te violinista! Kua tapaina e Aroha ko ‘Tangitón’.

Ahakoa te pūoro terrible me ngā kauhau tino sentimentales me ngā mahi kōtētē roimata, kei te mihi ki te aroha o te iwi chileno me te mahi whakatangata i te hunga hauā.

I haere ki tētahi wharekai Hainamana mo te almuerzo (tina). Fue un gran error. Ko te tūmanako e mārama ana koutou.

Hei whakamutunga, anei tētahi rārangi waka e whakanui ana i el Teletón.

El mundo digital II

2008-11-26T17:44:00.000-08:00

Titiro ki ngā whakaahua a tētahi tangata no Mumbai, a Vinukumar Ranganathan. Ka nui ngā whakaahua mō ngā putanga o ngā mahi a ngā terroristas. Ina titiro haere ka kite hoki i te Mumbai o inanahi, arā, he Mumbai hūmārie. Engari te ao hurihuri!

He ao hurihuri, un mundo digital

2008-11-26T16:10:00.000-08:00

Kua hipa te iwa o ngā hāora i te ahiahi, kāore e roa ka pōngia. I noho tonu au ki te kāinga i te rā nei, e whārōrō tonu ana i te rewharewha.

Ka oho au i te siesta i te ono kia kite i ngā raruraru i Mumbai. Engari te hanga kino. He aha te tangata e tae ai te tangata ki te whakamate tangata tauhōu hei whakaari whakaaro, hei whakaari whakapono? Hei te wā tātou ka kite mehemea he hononga ki Al-Qā’idah.

I te whai a Aroha i te poiwhana i tērā atu pouaka whakaaro. Kua hinga a Chile i a Nigeria, 0 – 2. Ahakoa i tairite a Aotearoa me Ingarangi, 1 – 1, kāore tō tātou tīma e eke ki ngā taumata o te whakataetae i te toa o Nigeria. Ka aroha hoki.

I te hekenga o te rā i tango ai au i te whitiata i raro nei. Engari tēnei ao, tōna hanga pai, tōna hanga ngahau, tōna hanga kino hoki!

Engari te tere o te whakawhitiwhiti kōrero i te ipurangi. Ahakoa te pai o te rongo tere i ngā mea e tūponopono ake ana i Mumbai (me te ao katoa), ka pātai ake mehemea kei te whāngai hoki i ngā raruraru.

Vicentico, el cantante argentino

2008-11-25T17:03:00.000-08:00

Anei tētahi o aku tino kaiwaiata nō tēnei pito o te ao. Ko Vicentico tōna ingoa, no Argentina ia. I mua ko ia te rangatira o te rōpū ko Los Fabulosos Cadillacs. E rata ana au ki tōna reo me ngā kupu o āna waiata. Ko tāna tino waiata, ki taku whakaaro, ko 'El Cielo', engari kāore i te ipurangi.

Heoi anō, anei te waiata Los Caminos de la Vida me ngā kupu españoles.

Los caminos de la vida,
no son los que yo esperaba,
no son los que yo creía,
no son los que imaginaba

Los caminos de la vida,
son muy difíciles de andarlos,
difíciles de caminarlos,
y no encuentro la salida.

Yo pensaba que la vida era distinta.
Cuando era chiquitito yo creía
que las cosas eran fácil como ayer,
que mi madre preocupada se esmeraba
por darme todo lo que necesitaba,
y me doy cuenta que tanto así no es.

Porque a mi madre la veo cansada
de trabajar por mi hermano y por mí.
Y ahora con ganas quisiera ayudarla,
y por ella la peleo hasta el fin.
Por ella lucharé hasta que me muera,
y por ella no me quiero morir.
Tampoco que se me muera mi vieja,
pero yo sé que el destino es así.

Na, anei ngā kupu maories!

Ko ngā huarahi o te oranga
ehara i tāku i tūmanako ai,
ehara i tāku i whakapono ai,
ehara i tāku i wawata ai.

Ko ngā huarahi o te oranga,
he uaua rawa te whai atu,
he uaua te hīkoi atu,
kāore hoki au e kite i te putanga atu.

I te pōhēhē au he mea rere kē te oranga.
I au e tino tamariki ana i te whakapono
ka ngāwari ngā mea kia pērā me inanahi.
Ka ngana tōku māmā māharahara
ki te hōmai i ngā mea katoa e hapa ana au,
ā, kua ako au kāore tonu e pērā rawa.

I te mea ka kite atu au i tōku māmā ngenge noa
i te mahi mā māua ko tōku teina.
Na, ināianei e hiahia kaha ana ki te āwhina i a ia,
ā, ka whawhai au māna tae noa ki te mutunga.
Ka tohe māna kia mate rawa au.
Ā, māna anō, kāore e hiahia kia mate rawa au.
Kāore hoki kia mate rawa mai tōku hākui,
engari kei te mōhio au e pēnei ana te utu tangata.

Engari te pai o ngā kupu, nē ha? Hei te wā ka tāpiri i ētahi atu waiata reo Pāniora.

Estoy enfermo...

2008-11-24T11:55:00.000-08:00

He ātaahua rawa te rangi nei. Kei te tauriparipa rā ngā maunga puia e tūtū rangatira ana. Ehara i te wera rawa, he angiangi e pai ai te hau. Engari, ahakoa te pai o te rā, kei te māuiui kē au – estoy enfermo.

He pai noa, ka whai wā i reira kia tuhituhi i ētahi atu kōrero. I tērā wiki i tae mai tētahi karere i a Whaea Tracy. Kei te whai rātou ko ngā ākonga o te Tau 6 i te rātaka ipurangi nei. Ko rātou ko te mano me te tini! Me tūpato au kei tuhituhi noa iho i ngā kōrero ma te hunga pakeke. Nō reira...

Ka kōrero au i ngā puestos, i ngā pātaka hokohoko o Temuco. Ka nui ngā toa o te tāone nei, me ngā hupamākete, e rite ana ki ō Aotearoa. He Maketānara hoki e tata ana ki tō māua kāinga, ahakoa kāore anō kia kai i reira. Kei te taha o ngā rori, i runga i ngā ara hīkoi tau ai ngā puestos. Hei tīmatanga, māku ngā puestos de frutas y verduras (pātaka hua rākau, hua whenua) e kōrero.

I ia rā, i ia rā o te wiki hari ai ngā tāngata i ō rātou pātaka ki ō rātou ake wāhi. Ki reira karanga ai, “¡Frutillas! Dos kilos por mil quinientos.” (“Rōpere! E rua ngā kirokaramu mo te kotahi mano, e rima rau (pesos).”). Hokohoko ai rātou i ngā kai o te wā, arā, i ngā kai hōu o te māra. Haere mai ai ngā rōpere i te tāone tūtata o Angol. Kua puta mai hoki ngā cerezas (tiere) ināianei, engari te reka! E hia kē ngā kiro kua pau i a au! Koina taku kai i tēnei wā tonu!

Na, ko tētahi atu momo puesto ko te mea makahīni, nūpepa. Ko te nuinga he quiosco te āhua. I ia wiki, i ia wiki hoko ai au i ngā rerenga tāroi whenua, rerenga kōrero tawhito a te Geográfico Nacional. Ka aroha hoki ki te tangata me noho apuapu i roto i tōna pātaka mo te nuinga o te rā!

Ka nui ngā momo pātaka kē atu. Hokohoko ai rātou i ngā momo mea katoa – he wāti, he rare, he tōkena, he aha, he aha. Ko te nuinga he ambulantes, arā, he tāngata kāore he raihana hokohoko. Amuamu ai ngā toa i te mea ka aukati i ngā ara hīkoi, me te mea hoki he iti rawa te utu. Ka nui te amuamu, ka nukunuku noa ki wāhi kē!

I mea hoki a Whaea Tracy kua tino pai te hanga o te kura. Ko te āhua nei, kei te āwhina atu a Matua Eric i a Matua Rīhari. Ko te tūmanako ka tukuna mai he whakaahua.

El partido de fútbol y una película

2008-11-22T18:03:00.000-08:00

Anei māua ko Aroha e mātakitaki ana i te kēmu poiwhana i waenganui i a Aotearoa me Chile, 2 - 0. Engari te panapana o te manawa! Kāore rawa e tau, ahakoa ngā pisco sours. Kātahi anō a Chile ka whiwhi ki tō rātou piro tuatahi, ¡un gol espectácular!

Inākuanei hoki mai ai māua i te whare pikitia. I mātakitaki i te pikitia Ceguera (Kāpō). I a au i México i pānui au i te pukapuka a José Saramago, Ensayo Sobre La Ceguera. E whai pai ana te pikitia i te pukapuka. Ko te kaupapa ko te pā o te kāpō ki ngā tāngata o te ao – engari he rere kē. Kāore...

U! I tata whiwhi piro anō a Chile! Kia tūpato Aotearoa! Auē, he whana kokonga! Ā, ka pai, kāore i ū!

Tēnā, kāore...

Ka pai! Kua whiwhi piro anō a Aotearoa, 3 - 1! Hū! He uaua te tuhituhi i te rātaka nei.

Heoi, kāore ngā karu e hemo, arā, kāore e kite i te pango, ka mā kē, ānō e toromi ana i te miraka.

He piro anō tō Aotearoa, 4 - 1!

Hingahinga haere ngā tāngata i te mate rā, ā, ka mau motuhake (ānō he herehere) i roto i tētahi hohipera tawhito, kei peke te mate ki tangata kē. Engari, kāore i roa, ka tokomaha noa atu te hunga kāpō, ā, ka kitea te hanga pai me te hanga kino o te tangata. Ko tētahi o ngā kaupapa e mea ana...

Aī! He piro anō tō Chile, 4 – 2! ¡Sé fuerte, Nueva Zelanda!

E mea ana me mātua kāpō pea, kia tino kite. Kei mau i ngā whakaaro i tā te tangata e kite ana. Otirā, he pikitia tino pai rawa.

Na, kia hoki ki te kēmu. He whana kokonga. Auē, kua whiwhi a Percival ki te kāri whero. Ko te āhua nei kei te riri rawa ia... Ahakoa rā, he pai rawa te tākaro a ngā wāhine o te kāinga.

Kia tūpato he piro anō tō Chile, 4 – 3! E rua noa iho ngā mēneti kei te toe, kia tūpato! Ka pai, kua mutu! Engari te hunga oraiti! Engari ngā chilenas e tangitangi ana!

Ka moe pai a te pō nei!

Dos libros...

2008-11-21T10:22:00.000-08:00

Kātahi ka mutu te pānui i tētahi pukapuka tino pai, ko Te Naihi e Kore e Tuku nā Pātariki Ness. He nui ngā ito nui kua riro i taua pukapuka nei. Mau pai au i ngā kōrero, na, ka mutu i te rangi tuarua. Ahakoa ka waiho te kaipānui e tārewa ana, kāore e roa ka puta te pukapuka tuarua o ngā mea e toru. Kia tere mai rā!

Heoti, ka pupū ake ngā āwangawanga e rua. Ko wai mā ngā tamariki tino pānui pukapuka o te kura ināianei? Ka mahara tonu ki te wā e whawhai ai a Kimo mā i ngā pukapuka hōu. Me ngā tino tono kia hokona atu ētahi atu pukapuka.

Ko te āwangawanga tuarua ko ngā tāngata o te pukapuka. Ka tīmata te pakiwaitara i tētahi kāinga iti, kāore he wāhine. Ka rongo hoki ngā tāngata katoa, tāne mai, tama mai, i ō rātou whakaaro me ō ngā mea ora katoa, kāore rawa te hoihoi o ngā whakaaro e mutu. Kua mate katoa ngā wāhine i tētahi mate i peke i te tangata whenua o te ao nei, i ngā ‘Spackle’. I rere mai ngā tāngata i tō tātou ao, e tahuti atu ana i ngā hanga kino o konei.

Engari, i tētahi rā, ka tūpono a tuahangata, a Todd Hewitt, ki tētahi wāhi wahangū. Ā, ko te take ko tētahi kōtiro kātahi ka tae mai i te rangi. Na, me pānui koutou i te pukapuka kia mōhio ai ki ngā mahi e whai ake rā.

Ko te mea i āwangawanga ai au, ko tēnei nā, he Pākehā katoa ngā tāngata. Ko rātou anahe ngā tāngata a muri ake nei? Ka nui ngā pūrongo mo te pukapuka nei, kāore rawa tētahi i kōrero i taua hanga nei. Ko te kāpō o te hunga kaha! Otirā, he pukapuka tino pai tonu!

Na, i tēnei wā kei te pānui i te pūrongo Ahunga o te Ao 2025: He Ao Rere Kē (Global Trends 2025) na te Kaunihera-ā-Motu o te Mōhiohio o Amerika. Kei te whakapae i ngā hanga o te ao a te tau 2025. He pai rawa ki a au te pānui i ā rātou whakaaro. Ehara i te wawata noa. Ka ahuahu ake tā rātou e whakapae ana i te āta tirotiro ki ngā ahunga, mohoa ake nei, me ngā āhuatanga hōu e putaputa ana i te ao hurihuri nei. Ka mau te wehi!

Heoti, kāore rawa te tangatatanga e tino kōrerohia. Ko te moni, ko ngā taonga, ko te mana, ā, koina ngā mea kei te āta kōrerohia, ānō ka tika te tangata i ngā taputapu. Kotahi anahe te wā i huaina a Aotearoa (me te kaumatua haere o te iwi – whārangi 19)! Ko te kāpō anō o te hunga kaha?

Ina pānui a Pātariki Ness i te pūrongo Marikena, tērā pea, ka kitea he Hainamana i te pukapuka tuatoru!

Dicho o te rā

2008-11-20T14:15:00.000-08:00

Kua roa, engari anei te whakataukī tuarua ‘o te rā’.

Ser un cero a la izquierda.
He kore nō mauī.

Kei te kōrero mo te kore i te taha mauī o te ira, hei tauira 0.2. Nō reira he kōrero tēnei mo te tangata ehara i te tino atamai, ehara i te tangata oti! I tino katakata au i te wā tuatahi i rongo ai au i te whakataukī nei. Hei tauira, ka mea:

Pedro es un cero a la izquierda.

He kore a Pita nō mauī.

Kia mōhio mai koe ka whakawhitia te ira (punto) me te pītā (coma) i te ao reo Pāniora. Nō reira:

2.003.000 – dos millones, tres mil (e rua miriona, e toru mano)
0,075 – cero coma cero setenta y cinco (kore ira kore whitu rima)

Capitán Pastene

2008-11-18T11:47:00.000-08:00

I te Rātapu nei i hāereere, hei wā tuatahi, i runga i ‘El Tanque’. Koina tā māua ingoa mo te Cherokee Jeep i hōmai e te rangatira o te whare pākoro, e la señora Sabine Sauer. He nui rawa, ā, ka kai kaha i te penehīni, engari te pai o te taraiwa!

I mātua peke atu ki te whare o te whānau Sade. Ka eke mai a Kamil rāua ko Benjamín hei hoa mō māua, na, ka haere. Kāore mātou i haere ma te huarahi matua, ka haere kē ma Chol Chol, Galvarino, Lumaco, ā, ka tae atu ki Capitán Pastene.

El capitán Juan Bautista Pastene (1507-c1580) fue italiano, he hoa raupatu ia no Pedro de Valdivia, el conquistador de Chile. Kia tata nei ki te 400 rau tau i muri mai i tae atu ki Chile tētahi hunga manene no Itarī. He hunga pōhara rātou no te takiwā o Emilia Romagna. Ko te wāhi i tau ai rātou i whakaingoatia mo te Itariano i tae atu i te taha o Valdivia.

Kei reira tonu ngā uri e noho ana. Kei te whai tonu i ngā tikanga o ō rātou tūpuna. He rongonui te tāone o Capitán Pastene mo te pai o te pasta, o te salami, o te mondiola (he mīti paoa pakapaka). Engari te reka o te kai!

Ka hoki ma tātahi. Engari te kino o te huarahi! He whāiti, he kōpikopiko, me te nui o te puehu! Ka tae ki Tirúa, ka peka atu ki te moana, engari ka tae ki tētahi rae teitei rawa! Ka oma atu a Benjamín ki raro, ā, ka whai atu te hunga tāne. He roa rawa, he poupou rawa te hekenga. Me te kaha o te hau. Otirā, he rawe te tirohanga atu ki Te Moana-nui-a-Kiwa.

I te pikinga anō ki runga ka kai i te nalca. Ka kite koutou i rau nalca i mua i a Quemel mā. Koina tētahi o ngā tino kai a te Mapuche. He rite ki te apio.

Na, hoki rawa ki te kāinga kua pōngia kētia a Temuco.

Tatau kupu...

2008-11-15T15:30:00.000-08:00

Inapō i haere atu māua ki te hui tatau kupu Ingarihi. He tino pai! Ko te mea ohorere rawa ko ngā tamariki Tau 3 (segundo grado) – he roa rawa te whakataetae, especialmente o te tokorua whakamutunga. I te mutunga ake i toa te kōtiro, engari tō rāua kaha! He uaua te rongo atu i ētahi o ngā kupu i te kaha o te whakahua chileno!

I tino koa a Aroha i te mea i whai wāhi ētahi o ana ākonga, ko Leandro rāua ko Colin. Ko Daniela te toa o te hunga pakeke, kei roto ia i taku ranga Tātai.

La protesta...

2008-11-12T06:57:00.000-08:00

Engari ngā hīkoi chileno! Tērā pea kua kite koutou i te pouaka whakaata ngā kaimahi chileno e hīkoi ana kia nui atu ai ngā moni.

Tērā pea ka pōhēhētia he carnaval kē. Ka nui ngā wīhara, ngā pūtātara, ngā taramu. Ka ūmere kaha ngā tāngata i ā rātou whakaaraara. Me te hanga hoahoa o te iwi, ahakoa ngā carabineros (pirihimana). Kei raro nei tētahi whitiata poto i tangohia i te parana o te departamento.

Kei te whakaaro...

2008-11-11T15:46:00.000-08:00

Kātahi te rangi pai – kāore he kapua, kua mahana haere (ahakoa kua wera haere te whare pākoro), kei te kitea paitia te maunga puia, El Llaima (ahakoa te kōrehurehu). Kua tino rata ki te noho ki konei, me te ngāwari o ngā mahi. Ka haere ki te kura āwhina atu ai - mo te wā poto. Ka haere ki ngā akoranga reo Pāniora i te whare wānanga - mo te wā poto. Nō reira, ka nui ngā hāora hei pānui (pukapuka, makahini, pūrongo nūpepa), hei mātakitaki i te pouaka whakaata (CNN, El Gourmet), hei tuhituhi, hei kai i ngā kai a Luisa, hei whakaaro – whakaaroaro noa.

Na, kei te noho ki konei, me te tirohanga whakamīharo i waho, me te pisco sour ki tāhaki, me te pātai ake – ka pēhea māua hei te hokitanga atu?!

Otirā, ko tētahi o ngā mea e whakaaro ana au ko te noho tahi a Nahinare me te uepū Māori. I mua kāore rawa au i te rata ki tēnā āhuatanga, engari kei te huri ngā whakaaro. Ehara i te mea kua rata atu ki Nahinare, engari ko ngā painga mo te uepū Māori.

Kātahi anō ka mutu te pānui i te pūrongo i te Herara na Paranihia O’Sullivan http://www.nzherald.co.nz/business/news/article.cfm?c_id=3&objectid=10542492. Kei te akiaki ia i a Hone Kī kia haere ki te hui o ngā rangatira o APEC hei Lima a tērā wiki. Engari te hōhonu me te whānui o ana kōrero! Me taku whakaaro – me haere tētahi Māori atamai ki reira whakarongo ai, whakaaro ai, pūrongo ai... whakapakari ake ai! Ahakoa te poto o te wā, me tere te whakatau ina noho atu te uepū Māori hei hoa kāwanatanga mo Nahinare, kāore rānei. Ki te whakaae atu, me haere hoki tētahi māngai (‘taringa’ rānei) o te uepū Māori ki ērā momo hui. Kāore au i te kōrero mo Hone Harawira – kei kōtiti te haere!

Ehara i te mea hei whakapakari i te uepū Māori tāku e marohi ana. Engari me haere hoki hei tauira. Hei tauira e mea ana ki te ao, ka rite ngā hunga katoa o Aotearoa ki te mahi tahi me te tangata whenua, ahakoa no mauī, no katau, nō waenga. Me kōrero pēnei te uepū Māori ki a Nahinare! Kei pōhēhē rātou ko te mana whakahaere Pāremata anahe te painga o te uepū Māori!

Me ngā pūrongo e mea ana ko tā te iwi Māori hiahia ko te piri atu ki a Reipa? Ki ahau me tautoko tātou i a Reipa i ngā wā e whai painga ai te iwi Māori. Kei noho tātou hei hipi. Ahakoa ngā painga o Herena Karaka, ki ahau nei kotahi tana tino hara. Ehara i te tāpiri atu i tōna ingoa ki te pēita a tētahi atu, ehara hoki i te tono ki tana kaitaraiwa kia tere rawa. E kāo! Ko te whakanui atu i te hipi, i a Shrek, i ngā tini Māori o te hīkoi (i runga i tōna pōhēhē he hipi hoki te iwi Māori). Ka nui atu te mana o te mōkai a ētahi Pākehā ouou nei i te tokomaha o ngā Māori? Otō! Tōna whakahīhī, te kōpīpī hoki o tōna ngākau i taua wā!

Engari ka pērā te iwi manakore, ka whaiwhai noa hei hipi. Kua tae ki te wā kia whakarae ake ngā māhunga i runga i te tūwatawata. Ko te tūmanako ka tū ētahi o te uepū Māori hei tumu whakarae. ( Kei te kite koutou i taku rata ki te kupu 'whakarae'?)

Koinei hoki te wā me tino kaha ngā tāngata whenua, kei noho hei pungarehu mo te ahi e pau ai ngā pūtea o te ao kaipakihi. Engari kei te kā tonu ētahi o ngā rama. Kātahi anō te Perehitini o Colombia, a Álvaro Uribe Vélez, ka tūtaki i ētahi o te tangata whenua o tōna whenua. Koina tā tātou hei āwhina i te ao? (Kāore rawa au i te kōrero i a Shrek i tēnei wā!)

Nō reira, e mea atu ana ahau ki te uepū Māori – kia kaha! Me rapu hoki i ngā tikanga e pai ai te whakamārama atu ki te iwi. Me tīmata ki te taunga ipurangi! Ko te nuinga o ngā pānui e rite ana ki te kēmu tēnihi, arā, nō wai ngā whakaaro pai ake! Hei aha te hanga whakataetae!

Me te reo Māori! Kia kaha hoki te ārahi i te iwi ki tō tātou reo (ki te ara e rata ai te iwi...).

Un poema

2008-11-09T07:20:00.000-08:00

Ko te tikanga i te haere atu mātou ko te whānau Sade Solar ki Capitán Pastene. He tāone Itariano tērā whaka te raki, he rongonui mo te pasta. Na, kua tahuri ki ngā mōteatea a Gabriela Mistral (http://en.wikipedia.org/wiki/Gabriela_Mistral), he poeta chilena i toa i te ito Nōpera i te tau 1945, ko ia te tuatahi o Amerika Reo Pāniora i toa.

Otirā, kei raro nei tētahi o āna mōteatea e rata ana au.

PIECECITOS
A doña lsaura Dinator

...

Piececitos de niño,

azulosos de frío,

¡cómo os ven y no os cubren,

Dios mío!

...

¡Piececitos heridos

por los guijarros todos,

ultrajados de nieves

y lodos!
...

El hombre ciego ignora

que por donde pasáis,

una flor de luz viva

dejáis;

...

que allí donde ponéis

la plantita sangrante,

el nardo nace más

fragante.
...

Sed, puesto que marcháis

por los caminos rectos,

heroicos como sois

perfectos.

...

Piececitos de niño,

dos joyitas sufrientes,

¡cómo pasan sin veros

las gentes!

...

...

WAEWAE NONOHI
Ma te wahine Isaura Dinator

...

E ngā waewae nonohi o te tamaiti,
kikorangi i te makariri,
engari rātou e kite ana i a kōrua,

ā, kāore e uhi atu! Otō!

...

Waewae nonohi, whara katoa
i ngā kiripōhatu,
tūkinotia ki te hukapapa,
ki te kene!

...

Kūware atu ana te tangata kāpō
ko te wāhi e haere ana kōrua,

te wāhi e waiho ai
he pua mārama pūaho;

...

ko reira e tau ai
te tapuwae iti e toto ana,
ka nui atu te pūkarakara
o te nāra.

...

Kia māia, i a kōrua
e hīkoi ana i ngā ara torotika,
ānō tō kōrua
hanga tika rawa.

...

E ngā waewae nonohi o te tamaiti,

e rua ngā kahurangi e mamae ana,

pehea rā te iwi e taha atu,

e kore rā e kite atu i a korua!

¡Qué Dios los cuide!

2008-11-08T07:43:00.000-08:00

Kei te uaina rawatia a Temuco i te rā nei. He tohu pea mō ngā ākonga o te kura i Haitī, ka aroha hoki.

Engari ngā putanga i Aotearoa! Kua riro pai te Kāwanatanga i te kanohi kiritea. Kia kaha, Georgina, kōrua ko Tau!

He uaua te whakarongo atu ki te whaikōrero a John Key i muri tata nei i tā Barack Obama. Ānō he tamaiti i roto i te toa rare! Hei te wā pea ka whakarangatira...

I mea a John Key kua whakapā atu ki a Tariana Tūria whakarite ai i tētahi hui. Ko te tūmanako ka āta whakaaro te uepū Māori. Tērā pea ka pai te noho whakahē kia pakari ai ngā kaupapa here, kia kite ai hoki te mana o te uepū Reipa i ngā tau e whai ake nei.

Heoti, ka nui ngā mihi ki a Te Ururoa Flavell. E 68% o te pōti mo te māngai. Ka whakahī a Ngāti Rangiwewehi i reira.

Whakaaroaro ana

2008-11-07T17:07:00.000-08:00

I tukuna atu ā māua pepa pōti inanahi, engari, i tēnei wā, kei konei au e noho ana i te taha o te wini. Kua pōngia māua nei i Temuco. He kaha te pupuhi o te hau, nō reira e mārama ana te titiro atu ki ngā rama pīataata o te tāone. Kei te whakarongo hoki ki ngā kōrero a Derek Lardelli mo te whakaaturanga ‘Tohorā’ i Washington (ko taua wāhi anō rā!). He wā pai rawa hei whakaaroaro i te hanga o te ao!

I te mea kua mutu te pōtitanga Marikena, i tāhurihuri te māhunga ki te rapu kai ma te hinengaro. Otirā, i ngā wiki i mua i te pō whakamīharo o te 4 o Noema i te whaiwhai au i ngā blog a Justin Hewitt mā o te BBC. Koina tāku i ia rā, i ia rā, ko te tatari takakino kia puta ō rātou whakaaro mō tā rātou i kite ai. Engari ināianei...

Koina i huri ai ki ngā mahi pōti o Aotearoa. Kāore rawa e rite ki te mana o tō Amerika, engari tonu... Na, ka tahuri ki te rapu kōrero mō ngā hiahia a ngā uepū (he pai atu te kupu rā i te ‘tōrangapū’), e tīmata ana ki te Pāti Māori. Ohorere kau ana i te iti o te reo Māori i tō rātou taunga ipurangi! Kāore hoki au i kite i ngā rerenga Māori o ā rātou kaupapa here.

Kātahi au ka tahuri ki te rapu blog reo Māori. E hoa mā, kei hea kē? Nāwai rā, ka tuku karere atu ki Te Taura Whiri pātai atu ai. He tere rawa te whakahoki kōrero mai a Gareth Seymour e mea ana, taihoa rā, kotahi anahe te blog e mōhio ana rātou, ko tā Quinton Hita tērā. Heoi anō, he pai atu i te kore. Engari nō Māehe rānō tāna tuhinga whakamutunga, kāore e kore na te matekiri ki te iti o ngā whakahokinga kōrero (he hanga e mōhio pai ana au). Me mihi i konei ki a Kōtuku Tibble. Kia kaha hoki koutou (kōrua? koe?) ki te tuku kōrero atu ki a Q (http://tuhikau.wordpress.com/).

He aha i pēnei ai? Ko tō tātou tokoiti? Ko te matakawa ki te pānui? Ko te hanga o ngā tuhinga Māori? Engari, titiro ki ngā tini karere a ngā ākonga kura kaupapa Māori kei ngā taunga Bebo, kei ngā taunga MySpace. Atā! Mehemea he urupā mō tō tātou reo rangatira me ngā whakaaro hōhonu, kei reira!

Ahakoa rā, me tino tūpato kei mau tō tātou reo ki ngā kura kaupapa Māori (hmmm), ki ngā whaikōrero marae, pāremata, ki ngā pānui a te Kāwanatanga. E hoa mā, kei matekiri tātou katoa!

Hei kōrero whakamutunga, ko te tūmanako ka toa te Pāti Māori, hei hoa tenetene mo te Kāwanatanga hōu. Me te wawata hoki ka rapu hoki i ngā tikanga e rangatira ai tō tātou reo i te maha o ngā waha me ngā ringa Māori!

Kei runga rā ngā whakaahua o Apirana Ngata rāua ko Te Rangihīroa. Engari rā tā rāua ‘blog’, Nā Tō Hoa Aroha.

He ao hōu

2008-11-05T03:45:00.000-08:00

"Ki a koutou katoa hoki e pātai ake ana mehemea kei te kā ratarata tonu te rama o Amerika: I te pō tonu nei, kua whakaatu anō mātou ehara kē te kaha tūturu o tō mātou whenua no te rahi rānei o ā mātou rākau patu, no te maha rānei o ā mātou hautaonga, engari no te mana ukauka o ō mātou tikanga: ko te manapori, ko te mana motuhake, ko te rau whiringa, ko te tūmanako pūmau."

Barack Obama

Chicago, Illinois

4 Noema 2008

Te whakataukī del día

2008-11-04T05:05:00.000-08:00

Tērā pea he tangata waha Māori o waho rā e hiahia ana ki te ako i ētahi o ngā whakataukī no whenua kē. Ka nui ngā whakataukī whakaihiihi o Chile. Kei te kōrerohia te nuinga i ngā pito e maha o te ao waha Pāniora.

Nō reira, hei tīmatanga:

Hijo de tigre, sale rayado.

Ko tā te taika kūao, ka puta kotikoti.

Arā, ka rite te tamaiti ki tōna matua.

Mehemea kei te mōhio koe ki te whakataukī Māori e hāngai atu ana rānei, e whakahē atu ana rānei, tēnā, tukuna mai.

He maimai aroha

2008-11-03T12:48:00.000-08:00

No te Rāwhā o tērā wiki rongo ai i te mate o te pāpā o Lionel mā. Ka aroha hoki aua tama! Ko te tūmanako ka tū tonu te kura hei tumu mō rātou.

I te Rāhoroi i te kōrero māua ki a Aramoana mō ngā hāora e rua me te hāwhe, ā, no te rangi i whai mai hinga ai tōna māmā. Aī, tō māua tino hoa...

Na, ka waea ki a Koa whakarite ai i ngā putiputi i te tukuna atu ka whākī mai ia i te pēpi o te whānau Tūtaki i ngaro atu rā i te māuiui.

Kei te tangi aroha atu ki ngā whānau e toru.

Nō reira, e te whaea, e te taokete, e te pōtiki, haere, haere, haere!

Dos días divertidos

2008-11-03T12:29:00.000-08:00

Aī! Kua tōmuri rawa te tuhinga nei. Kāore he tino take, āe, kua mau i ngā whakaaturanga a CNN i te whakataetae pōti, me te whaiwhai i ngā kōrero i te ipurangi. Engari te waimarie o Ruakiri! I tae atu rāua ko Kuirangi ki tētahi o ngā kauhau a Barack Obama. Kia tū pērā i te aroaro o te hītori! Kia kaha, e Barack! Ka aroha hoki, te nui o ngā tūmanako ka wahaina e ia ina toa!

Na, i te Rārima, i te 24 o Oketopa i kati te kura kia whakanuia ai te rā o ngā kaiako e ngā kaiako. Ka haere mātou ki Niágara, he wāhi mahi werowero. Kātahi te rangi pai. Ko te mea tuatahi ko te arawhiti iriiri. Na, ka tahuri ki te pasa mano (tirohia te whakaahua), na, i muri i tērā ko te canopy (pōkiha rērere). He rawe hoki! Ka mahi i ngā mea e toru. Ko te mea whakamutunga he tino roa rawa atu, engari te pai!

I raru a Aroha i te teitei, koina i mahi tahi ai me te kaitohutohu. Engari ka takitahi i te mea tuarua. Ka nui te mihi! Ka eke hōiho hoki. Ka piki tahi māua i te tahiwi i runga i a Napoleón. Me whakarite cabalgata (ekenga hōiho) i mua i te hokinga atu ki Aotearoa.

Na, i te rangi i muri mai i haere māua i te taha o Quemel rāua ko Viviana ki Metrenco whakanui ai i te nguillatun. Koina te hui Mapuche e pai ai te hauhakenga. Mahia ai i Metrenco i ia whā tau, i ia whā tau. Kāore e taea te mau wāti, te mau kahurangi, te mau kāmera, te mau weru whero (koina te tae o te mate ki ngā Mapuche). Me rapu ngā whakaahua i te ipurangi.

Ka tae atu ki reira, he ao anō. Ka nui ngā tāne i runga i ngā hōiho e hāereere ana. Kei ngā taha e rua o te pātiki e rua he rārangi tēneti nō tērā whānau, nō tērā whānau. He ahi i mua i te tēneti hei tunu i ngā kai. Ka haere tika atu mātou ki te tēneti o Armando rāua ko Carmelita i pōhiri rā i a mātou.

I tētahi pito o te pātiki ko te awün, he wāhi tapu, he mea porohita. I waenganui ngā chemamüll (atua whakairo) e tūtū ana. He hipi hoki, hei whakahere, kei te awün, me ētahi atu kai. I reira hoki ngā tāngata, tāne mai, wāhine mai, kaumātua mai, taiohi mai, tamariki mai, e kanikani ana. Kua tohua ngā pāpāringa ki te porohita iti, he mā i roto i te kikorangi. Kua mau ngā korowai weru mā. I runga ngā haki e kapakapa ana, he kikorangi, he mā hoki. Na, hurihuri noa i waho o te awün, ko ngā hōiho mau tangata e horohoro ana.

Ka rongo i reira te mana me te kaha o te iwi Mapuche. Koina i noho mana motuhake i ngā Pāniora mo te toru rau tau. Ka mau te wehi. Ahakoa tērā kāore rawa au i rongo i ngā Mapuche e kōrero ana i tō rātou reo, i te Mapudungun (‘te reo whenua’), i tua atu i te karanga kia haere ki te tiki i tētahi wāhanga o te whakahere.

Ka mutu te mahi rā ka huri ngā tāngata ki te kai. He mote (he momo kānga waru), he cazuela (he tiu), he ... hōiho! Āe, ka kai hōiho māua! Ka titiro tītaha ki ngā tini hōiho e tūtū ana, hurihuri noa! He āhua rite te rongo ki te tia puihi.

He inu hoki – ko te muday (he inu waipiro i mahia ki te kānga) me te kanín (waina me te koka kora!). Ka tautohatoha i ngā inu i roto i te ipu kotahi. Ina hōmai tētahi i te inu ki a koe, me mātua whakamaringi ētahi ma te whenua. Ka inumia kia iti, ka whakahoki ai i te ipu. Ka nui te muday i inumia e māua ko Quemel. Harihari ai hoki i ngā pereti kai i waenganui i ngā tēneti hei whakahoahoa, hei whakamanamana.

I waho hoki o te pātiki tokomaha ngā tāngata e tatari ana kia uru. Me pōhiri te tangata e tētahi kia uru atu. I tō mātou wehenga i te ahiahi i reira tonu te nuinga. Te waimarie he pōhiri tō mātou.

Engari rā, ka hoki ki te kāinga ka rangona ngā trotecitos! Kua whai utu ngā hōiho!

Celebraciones

2008-10-16T13:56:00.000-07:00

Inapō i noho māua ki te mātakitaki i te taukumekume tuatoru a Obama rāua ko McCain, engari te hoihoi tangata i waho! Ka puta atu ki te parana titiro iho ai. Kīhai i kite i te aha. Ka hoki atu ki roto. Nāwai rā ka pākaru ake anō te hāmama me te umere. Ka mea mai a Aroha, “Koinei pea te pō o te kēmu poiwhana me te tīma o Argentina?”

Koina hoki! Ahakoa he whenua tūtata, ka nui te hanga whakataetae i waenganui i ngā whenua e rua. He rite ki a tātou ko ērā kei tāwāhi o Te Tai Poutini!

Mo te wā roa nei, kāore a Chile i tae atu ki te whakataetae mo te Kapu o Te Ao. Engari, ināianei kei te whakatata atu! Na, ka puta ngā tāngata i ō rātou whare, i ngā pāparakāuta ekeeke ai i ō rātou waka, ā, ka taraiwa hurihuri noa i te pūtahitanga o te tāone. Ka rongo i ngā tini hāona e karanga ana, me ngā tāngata i La Plaza de Armas e waiata ana. I runga ngā haki i ngā waka e kapakapa ana! He koanga ngākau te kitenga atu!

Ka mātakitaki tonu i te taukumekume, putaputa atu ai ki waho ina he tira waka roa. Otirā, i te kaha ake a McCain (aī, he mara!). Ko te tūmanako ka mau tonu i a Obama tōna tūranga!

Heoi anō, ko te tino toa o te pō ko Fabián Orellana (kei runga), nāna te piro kotahi o Chile, engari te piro i toa ai! He nui te hutupāoro i Aotearoa, engari kāore rawa e rite ki tō te poiwhana mana i konei!

I te ata, i te taenga atu ki te kura, ka kite i ngā ākonga e kihikihi ana, e awhiawhi ana i ngā kaiako. Ko te take koia te rā o ngā kaiako. He rangi tino nui i konei. Ko tā ngā ākonga ko te whakarite konohete mā ngā kaiako me te mihi ki tā te kaiako mahi. Ka kanikani te nuinga o ngā ranga. He kino ētahi, he pai ētahi, he rawe ētahi. Engari te hunga tamatāne i kanikani i te waiata Voulez-vous coucher avec moi? i roto i ngā pūeru Moulin Rouge! Ka kanikani a Pía no cuarto medio B i te flamenco, te rawe hoki!

Ko te whitiata whakamutunga a ngā ākonga he tino mihi. Ka nui ngā whakaahua me ngā kupu whakanui, arā, ānō he mātua, he hoa ngā kaiako. Kua kōrero kē au i te tino aroha o ngā ākonga o konei ki ō rātou kaiako, waihoki tō ngā kaiako ki ā rātou ākonga. Ka tangi tētahi o ngā kaiako i a ia e mātakitaki atu ana i te whitiata, ā, ka oma atu tētahi o ngā kōtiro ki te awhi i a ia.

Heoti, me kaha ake a Aotearoa ki te whakanui i ngā kaiako...

Empanadas y Pisco Sours

2008-10-14T17:36:00.000-07:00

Ko te 9:15 pm, ā, kātahi anō ka mutu tā māua cena (te hapa). Ko te kai ko ngā empanadas, ā, ko te kīnaki ko te tino inu waipiro o Chile, ko te pisco sour!

I te wiki whakamutunga i te whare o ngā Sade Solar i ako māua ki te mahi pisco sour. Ko te ‘pisco’ he rerenga kaha rawa (35%+) no te waina.

Hei tīmatanga ka kuhuna atu ngā karāehe kakau ki roto i te papa tio. Ko tā Quemel me tio ngā karāehe. Ka kōtētēngia ngā rēmana, kia rua mā ia karāehe, mā ia karāehe. Ka ringihia te wai rēmana ki roto i te ipu rūrū. Ka tāpiritia te huka (kia rua pea ngā pune nui) me te pisco (kia rite anō ki te rahi o te wai rēmana!). Finalmente, ka tāpiritia atu te tio. Ka taupokitia, ā, ka rūrūhia... ka rūrūhia... ka rūrūhia... kia rewa noa te huka (kia mamae rānei te ringa). Koina!

Na, ko ngā empanadas te tino kai o Chile. Ki a Luisa me parai. I muri i te kai i āna kei te whakaae atu au. Kua kai māua ko Aroha i ngā empanadas e hia kē i konei, engari kāore rawa i rite ki ā Luisa!

Ko te tikanga o te kupu ‘empanada’ ko te kai i roto i te parāoa (‘pan’). He pērā hoki ngā kupu ‘enchilada’ (‘i roto i te chile’), ‘entomatada’ (‘i roto i te wai tōmato’). Otira te rere kē te empanada o ia whenua, o ia whenua o te ao Paniora. Kei konei, mahia ai ki te mīti nakunaku, ki te ōriwa, ki te reihana, ki te hāniana, ki te hēki kōhua rawa, ā, ka uhia ki te poke. Ko te tino ingoa ko te ‘empanada de pino’ – deliciosa!

Te waimarie hoki, i mahi a Luisa i ngā empanada e maha. Kei te papa tio tonu ētahi e tatari atu ana! ¡Buen provecho!

¡Qué noche extraña!

2008-10-10T16:53:00.000-07:00

Anei māua ko Aroha e kai ana i ngā sopaipillas me te mātakitaki i a Barbra Streisand i te pouaka whakaahua nui RAWA ATU! Kei waho e ua ana. He ātaahua ngā tiriti me ngā tini raiti.

I mahi a Luisa i ngā sopaipilla i te rā nei. He momo parāoa parai engari ka tunua i te hinu huawhenua. He reka rawa atu, engari, ko te āhua nei, ka kai sopaipilla māua mo te wiki katoa, he maunga tonu kei te tēpu!

Hei kīnaki he chancho en piedra (‘he poaka i te kōhatu’), ko te hāniana me te tōmato me te koriana, he reka! Engari a Aroha, ka tohe ki te kai i ētahi sopaipillas me te pata me te tīamu paramu. Ka ohorere rawa ngā chilenos i reira, “¡Grasa con más grasa!”

Ka rongo hoki i ngā waiata a Barbra Streisand ka hoki ngā mahara ki ngā rekoata a taku māmā.

Temuco, Barbara Streisand, te ua, sopaipillas. Es así.

La Frontera

2008-10-08T18:11:00.000-07:00

Kātahi anō māua ko Aroha ka hoki mai i Concepción, i te tāone nui tuarua o Chile. I te mutunga wiki i mua i haere ma runga tereina ki Victoria, engari ‘fuimos, vimos y salimos’ (‘i haere, i kite, i wehe mai’), i te mea kāore he aha i reira, ahakoa te pai o te tereina.

Na, koina i whakarite ai kia haere ki tētahi wāhi whakaihiihi. Ka haere ma runga pahi, ā, ka tae ki Concepción a te 9:00 pm. Ka ohorere i te nui o te teihana pahi me te tokomaha o ngā tāngata. Ka haere i reira ma runga micro (pahi paku) ki te pūtahitanga, ā, ka tere kite i te hōtera, el Hotel San Sebastián. Ehara i te Ritz engari he pai tonu.

Ka rite te rūma, ka wehe atu ki te kimi wharekai. I te taha o te marae o te tāone, La Plaza de Armas, ko te wharekai La Nueva Piazza. Ka noho māua, ka tono ai i te pisco sour, koina tō māua kawa ahiahi ināianei. I te tēpu ki tāhaki tētahi rōpū nei. Ka kite atu i ngā tāngata e haere atu ana ki te kaumātua o te rōpū, īnoi ai i tana hainatanga. Ka pātai ki te tūmau kai mōna, na, ka mea mai ko te whānau Parra, ā, ko te koroua he mema no te rōpū waiata ‘Los Jaivas’ (tirohia en.wikipedia.org/wiki/Los_Jaivas). Koina tētahi o ngā rōpū i pai ai a César!

He whānau rongonui ngā Parra. Ko tētahi o rātou ko Violeta, he kaitito waiata tino pai rawa atu. Kimihia ana waiata i YouTube, me Los Jaivas hoki! I raruraru rātou katoa i te wā i a General Pinochet, he wā tino raruraru no te hitori o te whenua nei. No te wiki i mua kite ai māua i te pikitia ‘Tony Manero’, he pikitia mō taua wā, ā, he tauira te pakiwaiata mo te mahi turaki kawanatanga a Pinochet mā. Ina tae ki Aotearoa, me haere ki te mātakitaki atu.

Mo te wā roa, ko te awa Bío Bío te rohe i waenganui i ngā Pāniora me ngā Mapuche. Koina hoki te wāhi i mate ai a Pedro de Valdivia, i patua e ngā Mapuche. I te ata i muri mai ka peke atu ki te museo tirotiro ai ki ngā tauira whakairo o te hitori o te takiwā. Ko te mau i a Valdivia tētahi. Otirā, i mau te mana motuhake o ngā Mapuche mo te 300 tau!

I muri i te kai Hainamana, ka haere atu mātou ki Talcahuano, te tāone tauranga waka o Concepción. I reira te kaipuke taua ‘Huáscar’. I hangā i Ingarangi mō ngā Peruano engari i tangohia e ngā Chileno i La Guerra del Pacífico (te pakanga o Te Moana-Nui-a-Kiwa) i te tau 1879 i riro ai te raki o te whenua i a Chile (no Perū me Porīwia i mua). Otirā i mate te rangatira o ngā Chileno, a Arturo Prat, i te wā i eke ai ia ki runga i te Huáscar. Tirohia a Aroha i te taha o te pēita. Koina hoki te ingoa o te tiriti e noho ana māua i Temuco, la Avenida Arturo Prat.

Ka hoki ki tuawhenua ka tere atu ki tētahi o wharekai i te taha o te moana inu ai i te pisco sour. Na te tūmau i mahi i mua i a māua, te mea pai rawa o ngā mea kua inumia e māua! Ka hoki ki tō māua hōtera hōu, ko el Hotel Ritz. Engari te hē o te ingoa, ehara rawa i te Ritz!!

I te ata i haere ma runga micro ki te tonga ki te tāoned tino pōhara o Lota. I mua he tāone kari waro engari kua kati ngā waro katoa. Koina te wāhi pōhara rawa kua kite māua i konei – kāore he mahi. Heoti, kua huri ētahi o ngā kaikari ki te mahi tūruhi. Na, ka haere ki te waro ko El Chiflón heke iho ai ki raro i te whenua me te moana! Ko Roberto tō māua kaiārahi. Engari te taumaha o ngā mahi i tērā wā! Tīmata ai ētahi ki te mahi i te wā 10 tau noa iho te pakeke! I hangaia te pikitia ‘Subterra’ mo te waro rā. Me kimi atu e au i Temuco.

Ka haere i reira ki te whare o ngā rangatira o te waro, ko ngā Cousiño. Engari te rerenga kētanga! Me tō rātou kāri, ānō ko Erena i waenganui i te ao weriweri!

Na, ka hoki ki Concepción, ka peke atu ki te whare wānanga. Engari te ātaahua. He maha ngā whānau e hāereere ana, e ngahau ana i te mahana o te ahiahi. Ka ahiahi rawa, ka tiki i ngā pīkau, ka haere atu ki te teihana pahi. Nāwai rā, ka tae ki Temuco i waenganui pō.

El departamento

2008-10-08T13:04:00.001-07:00

Tō māua waimarie ko Aroha! Kua nuku atu ki tō māua whare pākoro, me te pai hoki! Engari me whakamārama te take i waimarie pēnei ai.

I te wā i tae mai ai ki Chile i kōrero mai a Viviana mō tētahi hoa ōna e hiahia ana ki te rīhi i tana whare pākoro, engari e 400,000 pesos te utu mo te marama. Kāore a AFS e whakaae ki te utu e pērā ana te nui. Otirā, ka taha atu nga rā me ngā wiki e rapu ana i te whare, kāore rawa tētahi i kitea!

Na, ka tae atu te hoa, a Sabine, ki te tūtaki i a māua ko Aroha. Kīhai māua i mōhio ko ia te rangatira o taua whare pākoro rā. Otiia i pai mai taua wahine ki a māua, ā, ka whakahekea te utu ki te 280,000 pesos (arā, e $175 mo te wiki).

No muri tata mai i whākī mai ai a Viviana i mate te hoa tāne a Sabine i te rūma moe matua, nāna anō ia i pupuhi! I te raruraru i te mate pourua. Kāore rawa a Aroha i rata i reira! Heoti, i tae atu ki te whare nei... whakamīharo ana ki te pai o te whare!

Kei te papa tekau mā rua, kei runga rawa. He ātaahua rawa te tirohanga atu ki te pūtahitanga o Temuco, me ngā maunga puia e tūtū rangatira mai ana. I te whakaahua tuatahi kite ai koutou i ngā volcanes e toru, ko El Llaima te mea kei katau, koina te maunga i hū i te tīmatanga o te tau nei.

E rua ngā rūma moe, e toru ngā wharepaku, tāpu/hīrere (ko tētahi mo te tūmau!). Ko ngā taputapu katoa o roto he mea rangatira, ahakoa tūru (me he tūru romiromi tinana hoki!), ahakoa pereti, ahakoa aha. Ka nui ngā pēita ringa tangata (kāore he mea tārua). Me te nui o ngā pouaka whakaata e rua. Hei kīnaki ka wātea mai te Jeep Cherokee mō māua!

E toru ngā rā o te wiki e haere mai ai a Luisa, whakapaipai ai i te whare, whakarite ai i ngā kai. Hei hoa kōrero hoki mo Aroha. Kei te ako hoki a Aroha ki te mahi i ngā kai chileno.

Na, ka tae ki te ahiahi ka mahi au i te pisco sour, ā, ka noho ki te inu me te mātakitaki atu i te tāone e pōngia ana. Ka pō ka ramarama ake ngā tini rāiti. Ka hī te ata, kei kō El Llaima e tatari mai ana!

Engari tō māua waimarie ko Aroha...

Un momento de viejez

2008-10-08T11:04:00.000-07:00

Na, i te rā i whai mai i hoki atu ngā Sade Solar ki Chile i muri i tā tātou kai tahi i te almuerzo, he barbacoa anō! Āe, kāore he mīti o te ao (e mōhio ana au) e rite ana ki tō Argentina, ā, ko te mīti tuarua ko tō Chile!

I te rā i muri mai ka hoki ki te maunga o Chapelco retireti ai, otirā, ka retireti au. Ko tā Aroha he mātakitaki mai (engari tōna pai!) me te inaina. Ka nui te hukapapa kua rewa i ngā rangi e rua, engari e pai tonu ana te retireti. Ka piki au ki te taumata tuarua, engari te pai o te tirohanga atu!

Ka tata ki te rima o ngā hāora ka heke ki raro whakahoki ai i ngā taputapu. Koina te wā i tīmata ai te ‘hanga kaumātua’! Ka wareware i au te tiki atu i taku raihana taraiwa i hoatu rā hei punga mō ngā taputapu. Ka eke māua i te pahi, ā, ka heke ki San Martín...

Nāwai rā ka maharatia te raihana. Me aha? Ka tae ki San Martín, ka tiki atu i te tēkihi kia hoki ki te maunga engari 100 peso te utu. Ka peke māua ko te taxista ki te whare moni tango ai i te moni. Ka kuhuna atu te kāri moni, ā, ka hē te tau uru. Ka mahi anō, ka hē anō. Ka mahi anō, ā, ka mea mai te mīhini kua mau te kāri! Ka puta pōnānā ki waho, ka whakakore i te tēkihi ki te 6 peso, ā, ka huri ki te whare noho.

Kātahi anō ka mahara, ko te kāri crédito kē te kāri i kuhuna atu! Ka hoki atu ki te whare moni, ka kuhuna te kāri EFTPOS, ā, ka tika te tango moni! Ka tīkina atu tētahi atu tēkihi (he iti iho te utu i tō te mea tuatahi!), ā, ka hoki ki te maunga. Ka tae ki runga kua kati ngā toa katoa!

Ka hoki āwangawanga noa ki raro. Ka whakatoi mai a Aroha ki taku hanga kaumātua (kāore he tangata pai atu i te wahine aroha). Ka haere ki te tāone waea atu ai ki Westpac Aotearoa whakakore ai i te kāri. Ka mutu tērā, me aha kia tau ai te wairua? Koina... ka haere māua ki te kai! Me te reka hoki o te rēme me tō ngā pisco sours i te wharekai Piscis!

I te rangi i whai mai ka piki anō ki runga ki te maunga tiki atu ai i te raihana (i reira!!!!), ā, ka heke anō ki raro tirotiro haere ai i te tāone. Kua pai atu te ngākau ahakoa kua ngaro te tarjeta crédito whai mana i Argentina. Kia tino tau ai te wairua ka hoki anō ki te wharekai El Regional kai ai. Me tūpato au kei huri ki te kai i ngā wā katoa e mānukanuka ai!

No te Rārua rānō hoki mai ai ki Chile. Engari, i tēnei wā, e rua ngā hāora i te rohe whenua. I runga i tō mātou pahi he tama, kāore ōna pepa e tika ana, kāore hoki he moni. E rua ngā hāora kia kitea te huarahi e hoki ai ia ki San Martín. Ka hoki atu tētahi wahine noho tata i tōna taha. Ka aroha hoki!

Heoi anō, ka tae māua ki te kāinga, he mea matatau kē atu tēnei nā!

En la 'cazhe' Obeid

2008-10-01T04:17:00.001-07:00

Kua hoki mai i Argentina, kua whakatikaina ngā moni, kua siesta, ā, kua rite ki te patopato i ngā kōrero mō ngā rangi o mua tata nei...

Ka oho ake i te ata i muri tonu i te hokinga mai i te fiesta, ka horoi, ka heru, ka tono i te tekihi. Ka wehe i te teihana pahi, i El Rodoviario, i te 8:30. Ka haere ma Villarica, ma Pucón ki Curarrehue, kātahi ka tahuri ki te piki ki ngā Andes mā tētahi awaawa whāiti, ā, ka piki, ka piki. Kei ngā taha ngā maunga teitei, ngā maunga hauhunga. Nāwai rā ka tae ake ki te nonoti maunga, ki Mamuil Malal.

Kua tae mātou ki ao kē, kei tāhaki tētahi o ngā maunga puia nui rawa o los Andes, ko el volcán Lanín. Engari te ātaahua, engari te wanawana! Kei reira hoki te roto wai makariri o Lanín, me te whārua e tūtū ana ngā uru pehuén, ānō kua hoki ki tua whakarere. Koina te take i mahia ai ētahi o ngā wāhanga o ‘E Hīkoi ana me ngā Mokoweri’ i reira. ¡Increíble!

Koina hoki te rohe o Chile me Argentina, ā, e rua ngā whare uruwhenua. Ka rārangi atu mātou, ngā pāhehe o te pahi, tatari ai kia karangahia o mātou ingoa. Kātahi ka karangahia ‘Ahora’ (‘āianei’ i te reo Paniora). Aī! Ko Aroha kē tērā e karangahia ana! Ka titiro ngā hōia ki taku ingoa i runga i te pepa, ka mea kē, ‘Su marido’, ‘Ko tana tāne’!

Ka heke i los Andes ki te taha argentino ka rere kē te hanga o te whenua. Ānō ngā whenua whaka te rāwhiti, he tino maroke, ka nui hoki ngā pātītī taranui, ngā pampas. Ka tae ki te tāone o Junín de los Andes, ka huri anō ki ngā maunga kia tae ai ki San Martín de los Andes. Kātahi te tāone ātaahua ko tērā! Ānō he tāone no Witarina. He mā rawa ngā tiriti, ā, he rākau puapua kei te taha e tupu ana. Ka nui ngā toa tiakarete, me te manotini o ngā wharekai. Otirā, ko te mea tuatahi i whirihia ehara i te tino pai, he pōturi te ratorato, he nui rawa te utu! Ka mutu te kai ka hoki ki tō māua whare noho, ki Hueney Ruka (ko te reo Mapuche mo ‘te whare o ngā hoa’). He mahana pai (rawa) me ... te wai wera!

I te ata he hāereere te mahi me te tangotango whakaahua. Ka tae ki te poupoutanga o te rā, ka eke i te pahi i piki ai i te maunga o Chapelco. (Tērā pea kua kite koe i te nui o ngā ingoa wāhi e mutu ana ki te –co, koina te kupu Mapuche mo te wai. Nō reira e tohu ana a ‘Chapelco’ i te wai e rere ana i waenganui i ngā rākau ‘chapel’.)

Ka tae ki runga kua tae ao kē. Hurihuri noa he maunga hauhunga e rārangi atu ana. I raro te roto Lácar e pīataata ana, te ātaahua hoki! I runga rānō ko te tihi o Chapelco me ngā tini tāngata e retireti iho ana, ānō he kāhui pōpokorua. Ka tahuri au ki te tiki pūeru, ki te tiki taputapu. Ka ohorere te tūmau i te mōmona o te takapū o aku waewae, i te mea he iwi paku, he iwi whīroki ngā tāngata o konei.

Otirā, ka puta ki waho ka tūtaki i a Benjamín me te toenga o te whānau Sade Solar. Ka eke ki runga ki ngā ara retireti. Ka mātua kai, ka puta ki waho kia kite mehemea i te mau tonu i a au ngā tikanga retireti. Te waimarie hoki, i te mau tonu! Kei whakamā i ngā tamariki! Me taku koa hoki, kua wareware i a au te pai o te mahi retireti. Kia hoki ki Aotearoa me hokihoki atu ki Ruapehu i te takurua. Ka kōrero hoki a Aroha mo te hari mokopuna ki te maunga!

Ka mutu, ka heke anō ki San Martín. Ka horoi, ka haere atu ki te mōtera o ngā Sade Solar, ā, ka haere i reira ki te wharekai ‘El Regional’. Ko ā rātou kai nō tērā takiwā (koina te ingoa). Engari te nui, me te reka, me pai o te hanga o te kai. Ko tā Aroha inu ko te wai rahipere urutapu, ānō nā ngā anahera anō i kōtētē! Ka hoki ngata ki te moenga...

El tiempo dieciochero

2008-09-20T14:57:00.000-07:00

Ka nui ngā hanga rere kē o Chile i Aotearoa, na, ko tētahi ko te patriotismo, kei konei he nui rawa. I ngā wiki kua pahure ake nei, i te whakatatanga atu ki te rā whenua, ki te 18 o Hepetema, ka kitekite haere i ngā hanga chileno e putaputa ake ana.

Tērā ka kite i ngā tāngata e mau ana i ngā pūeru huaso (kaupoai) rānei, i ngā pūeru china (pūeru tradicional o ngā wāhine) rānei, e haere atu ana ki ngā whakaharatau cueca. Tērā ka kite i ngā haki e kapakapa ana i runga i ngā waka, i ngā whare, i ngā toa. Hurihuri noa ka kite i te mā me te whero me te kahurangi, koina ngā tae o te haki.

Me te kai hoki! Ka nui atu te kai empanada (pāi mīti, pāi kaimoana) me te inu chicha, he inu kerepe, he paku nei te waipiro. Na, he momo wairangi nō rātou, emgari he pai rawa te kitenga atu! Na, kei ngā wāhi katoa – cueca, cueca, cueca!

Ka pērā hoki te kura. E rima wiki mātou ko ngā kaiako e ako ana i te cueca. Ko ngā ākonga hoki i te ako i ngā momo kanikani o Chile, arā, ko ērā o Rapanui (kāore rātou e āwangawanga mehemea e tika ana), o Chiloe (he moutere kei te tonga), o ngā huasos (arā, ko te cueca), o te raki (he pērā me ngā Peruano).

Ko te wiki whakamutunga, e toru noa ngā rā, he wā whakariterite, he wā whakaotioti. Ko te mahi tuatahi ko te rā hākari e hari ai ngā rōpū i ngā momo kai nō tērā takiwā, nō tērā takiwā ki te kura, ā, ka taetae atu ngā kaiako me ngā ākonga katoa ngutungutu atu ai. I reira hoki ngā kai a te Mapuche no te ngahere – he maiharu (digüeñes) me he kākano no te pehuén (araucaria – ko te rākau whakapōrearea makimaki!).

Ko te rā whakamutunga te rā tino pai. I te ata i whakaatu ia ranga, ia ranga o te kura tuarua i ā rātou kanikani. Ko tā Cuarto Medio B te mea pai rawa, he mea nortino, no te raki. Ko ngā mea māngere o te ranga ētahi o ngā tino kaikanikani! Na, i te ahiahi ko ā te kura tuatahi me ngā kaiako. I uru a Aroha, engari ahau – kāhore, he hē nō ngā waewae!

I taua pō he hui whakangahau mā ngā kaiako – me te whakataetae ... cueca! I toa a Aroha rāua ko Enrique, he kaiako Pākeha rawa te āhua, engari he kaha rawa ki te kanikani (ahakoa he tāroa). Ka haere i reira i te taha o te tumuaki me tana tāne ki te whare o Enrique pāti ai. Kātahi te pāti pai!

He koanga ngākau te kite i te hunga pakeke e whakaatu ana i ā rātou taera cueca, me te koa hoki o ō rātou ngākau. Ka huri hoki ki te salsa me te cumbia – kātahi au ka toa! I te kai tonu i waenganui pō, ā, ka tū ki te waiata i te hīmene o te motu. Hoki rawa ki te kāinga i te 2:30 i te ata! E whā hāora i muri mai kua rite kia haere ki Argentina!

Aquí todo va de mal en peor

2008-09-03T19:06:00.000-07:00

Āe, he rerenga kōrero anō no taku tino pakiwaitara. Ehara i te kōrero tika mo te rā nei, engari inanahi...

Tae noa ki te ata inanahi kua ua mō ngā rangi e whitu, ā, kua maha ngā tiriti e raruraru ana. Ka mutu te parakuihi ka whakarite kia haere i te taha o Quemel rāua ko Benjamín i runga i te waka. Te waimarie hoki! Tae rawa atu mātou ki te mutunga o te Calle Inglaterra, kua waipuke pai. E rua poraka pea mātou e taraiwa ana i te awa hōu e huna ana i te tiriti. I te heke makerewhatu te ua.

Ka tae ki te kura kua kī rawa te awa i tāhaki. I te hāpunapuna hoki te wai i ngā pātū o te kura. Me te kaha tonu o te ua.

Kua riro i a au te whakahaere i te karaehe Primero B (Tau 10). E ai ki ngā kōrero he ranga tino kino, engari he pai noa, ahakoa te mākū o te nuinga o ngā ākonga. Kua mākū hoki te papa, ā, ka māniania te haere. Ka tata hinga au – te waimarie, kei kataina rawatia e ngā tamariki! Kāore hoki i pai te tuhituhi i runga i te papatuhituhi, kua mākū rawa hoki tērā! Koina ngā tohu...

I waenganui i te karāehe tuarua i tae mai te karere me hoki ngā ākonga me ngā kaiako ki te kāinga. Ka puta ki waho kua rere kē rawa te wāhi rā! Kua waipuke pai te marae o te kura, ā, kua tae kē te nuinga o ngā mātua tiki mai ai i ā rātou tamariki.

Continuamos...

Bueno, kua pai noa te rangi i konei ināianei, engari me haere tonu ngā kōrero mo te waipuke.

Otirā, i waho o te kura, i te rere noa ngā wai o te awa ki runga i te arawhiti, i ngā tiriti hoki. I te paratī ake te wai i mua i te arawhiti, kua taitāhia ngā tini pātara kirirapa! Ka tae mai a Quemel ka hoki ki te kāinga.

Ka mutu te almuerzo ka hoki atu ki te kura tangotango whakaahua ai. Te kino hoki o te āhua! E rua ngā whare raupākoro i waipuke ai te ūnga waka o te rua, ā, he pāpu e whakaputa ana i te wai. I waenganui i te kura he awa e rere atu ana, ā, ko te ‘Río Creare’! Te waimarie kāore te wai i rere atu ki roto i ngā whare, e 2 henimta anahe te rerenga kētanga!

Ka puta anō ki waho kāore he whakawhitinga maroke i te tiriti, ahakoa huri ki hea! Kua whakarite tētahi rārangi kōhatu e whiti ai te tangata ki rāwāhi, engari te mōrearea e taka ai ki roto i te wai! Otirā ka hoki waewae mākū ki te kāinga.

Na, te rangi i whai atu, kāore he kura...

Comenzó a llover como nunca

2008-09-01T12:07:00.000-07:00

Koina tētahi o ngā rerenga kōrero no taku tino pakiwaitara, no Es que somos muy pobres na Juan Rulfo. I a au kē tana pukapuka, a Pedro Páramo, engari kāore a El llano en llamas, tana kohinga pakiwaitara. Heoti, i haere atu au ki te hoko, ānō ko te tūtaki i tētahi tino hoa i muri i te wā roa!

Na, he tika rawa taua rerenga kōrero nei mō ngā rangi kua pahure ake nei. Kotahi wiki e ua ana, kāore rawa i mao! Ka pōhēhē māua ko Aroha he moana wai kei tua atu i ngā kapua, kāore tōna mutunga!

Hāpunapuna ai te wai i ngā rīpeka rori, ā, i ētahi wā ka waipuke te rīpekatanga katoa! Whāngaia ai aua kōpuapua rā ki ngā awa hōu e rere ana i te taha o te rori. Me tūpato rawa te tangata, ina tere mai ngā pahi, ngā micro, ka paratī ake he ngaru nui. Kāore e rongo i ngā micro i te haruru o te ua. Ahakoa rā, me peke ki te taha me te whakaheke i te hamarara hei ārai i te tsunami e tere mai ana!

Ka āta haere māua ko Aroha, tūmeke ake ai ina rongo i te motokā e whakatata mai ana, kei hoki kueo noa ki te kāinga. Kāore he raruraru ki ngā temuquenses, he mea automática mā rātou. Haere ai rātou me te hamarara, whakahekeheke ai ki te taha ina tata mai tētahi micro rānei, tētahi motukā rānei, kāore rawa e titiro ki te taha!

Otiia, i te Rāhoroi i tae mai te hoa o Viviana, a Teresita, ki te kāinga. I te whakahoki i tana tama ki Valdivia, na, ka pātai mai ina hiahia māua kia haere i tana taha ki reira, ki te kāinga o César. Nāwai rā i runga mātou ko Aroha, ko Viviana, ko Teresita, ko tāna tama, ko Karím, ko tana whaiāipo, ko Karén i te motukā e tere atu ana ki Valdivia i te ua patapataiāwhā. Na, i tere pai mātou i te mea 120 km/h te tere o ngā huarahi matua i konei. I muri rawa au e noho ana i waenganui i ngā pēke, como bodeguero, e whakaruaki ana.

Ka tae ki Valdivia, ka tau ki te hōtera, El Encanto del Río, i te taha o te awa. Kātahi te awa whānui. E toru ngā awa o Valdivia, ko te Calle Calle, ko te Cau Cau, ko te Valdivia. Na, ko te ua tonu e heke ana. He rawe te moe i te hōtera – tō māua ake wharepaku – me te wai wera me te rūma mahana!

I te ata ka hāereere i te tāone. I a māua i te taha o te awa ka maea ake te māhunga kaitā i te wai, he lobo de mar, he kekeno nui rawa atu. Ka ohorere pai a Aroha i reira! Ka tae atu ki te mākete, ko ngā tini momo kaimoana, ka waiwai te waha. Me ngā kekeno me ngā pelicanos e whawhai ana mō ngā para kai!

Na te mākū o te tāone i hoki ai ki te hōtera tatari ai i a Quemel mā. Ka tae mai ka haere mātou ki El Restaurante Flotante, i runga i te pāte i te awa. Ehara te kai i te tino pai, engari i tae tētahi koroua ki te kite i tōna hoa, ā, ka huri ki te waiata i ngā tango o Buenos Aires. Auē, te pai hoki!

Na, ka hoki mai ki Temuco, ko au te kaitaraiwa. E heke tonu ana te ua!

La comida chilena

2008-08-24T18:36:00.000-07:00

Kei te mihi ki te whānau Sade e whakarite ana i ngā momo kai katoa kia waia ai māua ki ngā kai o konei.

I te wiki, kai ai mātou ko Quemel, ko Viviana, ko Benjamín i te 7:15. Te waimarie o Aroha, kāore ia e mahi i te ata! Ko ā mātou kai ko te parāoa allulla. He mea porohita, ānō ko ngā kōnui me ngā kōroa e āhua ana i te porohita. E rua henimita pea te mātotoru. Ko ngā allullas integrales, arā, ko ngā mea kanokano ngā mea e pai ana ki a au.

Kainga ai te mea tuatahi me te tīhi me te mīti korokoro. Koina te kaha o te hanga Tiamana i konei. Ko te mea tuarua me te pata me te miere. Koina te kai i ia ata, i ia ata. I hoko granola i te wiki tuatahi engari kāore i rata atu. Ko te inu ko te tī rānei, ko te kawhe rānei. Kua whakaaturia te kawhe o Aotearoa ki a Quemel, ā, e rata mai ana. I te nuinga o te wā, kai ai rātou i te kawhe pūehuehu, Nescafé!

Ko te tina te kai nui, ā, karangahia ai te almuerzo i Chile nei. E whā ngā wāhanga, he hupa, he kōrau, he pereti matua, he purini. Kāore anō kia kai i te kai e kawa ana au! Kainga ai te tina i te 2:00 i te ahiahi.

Ko te kai tuatoru, ko te cena, kainga ai i te 8:30 i te ahiahi. Ka rite ki te parakuihi i te kāinga nei.

Inanahi i kai mātou i te asado, arā, te kai rorerore. Engari te reka! Kua haere atu māua ko Aroha ki te hupamākete hoko ai i ngā māwhitiwhiti moana. I reira kite ai au i ngā piritoka kaitā rawa, karangahia e rātou ko ngā picorocos, engari te reka! He rite ki te pāpaka. Ka mukua, ka kōhuatia, ā, ka karohia i te anga. Ka mutu, ka inumia te wai. Kātahi te pai! Engari ko tā Viviana, he paku rawa ngā mea i hokona!

I ohorere noa au i te nui o te kai i tunua. He reka katoa – ahakoa kaimoana, ahakoa mīti, ahakoa notinoti, ahakoa aha! Kāore au i kai i te cena, ahakoa he dulces árabes (keke arapi) i runga i te tēpu.

Ko te tūmanako kāore e hoki mōmona rawa ( i tuhi ‘rawa’ au!) ki te kāinga...

Kei wareware hoki i a au, i haere māua ko Aroha ki te mātakitaki i te ballet nacional de Chile i te pō o te Rārima. He tino pai ā rātou mahi, me tō rātou kaha hoki! I mua i tērā, i te tari o te tākuta. I te raruraru a Aroha. Engari te whakawhitiwhiti reo kia mārama ai mātou ko te rata, auē! Kua whakarite māua kia kaua e māuiui anō!

¡El Pacífico!

2008-08-18T15:20:00.000-07:00

Inanahi i haere atu mātou ki Puerto Saavedra, he tāone iti kei tātahi, kei te taha o Te Moana-nui-a-Kiwa. Ka wehe i Temuco, ka haere whaka te uru mā ngā tāone iti o Labranza, o Nueva Imperial, o Carahue, ā, ka tae ki reira. Ko te whenua, he rite rawa ki te takiwa o Pūtāruru i te takurua, arā, he mākūkū rawa te whenua. Ka nui ngā paina, ngā purukamu, ngā wātara – me te kōhi!

I mua i te taenga atu ki Carahue kite atu ai mātou i ngā tama e tūtū ana i te taha o te rori rūrū ai i te pākete me te pōhiri kia peka atu. Ka tū te waka, ā, ka heke ki te hoko kōura. He rere kē i ō te kāinga, ka noho ō Chile i te paru i te taha o te roto.

Ko Carahue anahe te tāone whakaihiihi tangata. I tētahi o ngā tiriti he rārangi roa rawa o ngā tereina tawhito, ngā mea kai ngārahu. Ānō he kapa kararehe kaitā nō tua whakarere. I te taha hoki o te marae o Carahue he whare pakitara kiri rino. Ka nui ā māua whakaahua ko Quemel mō taua whare! He rere kē rawa te hanga. Nō Enrique Thiers Díaz, tētahi o ngā mea o Carahue i mua rānō.

Ko Carahue te wāhi tuarua o Chile i whakaritea hei rohe hāhi, i te tau 1564, engari i te tau 1600 i mahue te tāone i te Pākeha i te tīmatanga o te pakanga o Arauco, o te pakanga i whakaputa ai ngā Mapuche i ngā Pākeha o tēnei takiwā mo te wā roa (titiro ki ).

Na, ka tae ki Puerto Saavedra, ānō kua tae ki te mutunga o te rori, engari i haere tonu ki te whanga whaka te tonga, ko Boca Budi. I reira tētahi wharekai kaimoana. Ko ā mātou kai ko ngā pipi, ko ngā empanadas de mariscos (pāi kaimoana), ko te ika parai, ko te raihi, ā, ka kīnakitia ki te pisco sour me te waina mā. Engari ko te kīnaki pai rawa atu ko te tirohanga atu ki te moana, ki tō tātou moana!

Ka mutu te kai ka heke ki te one mātakitaki ai i ngā kaihī, ripi kōhatu ai hoki. I te whakaaro mō ngā tamariki, mō ngā whanaunga, mō ngā hoa kei rāwāhi o te moana. Ka hoki anō ki Puerto Saavedra hoko ai i te ika hōu, ā, ka hoki whaka te kāinga. I te ngenge o Quemel rāua ko Viviana, nāku te waka i taraiwa. Kāore i roa kua moe rāua. Ahakoa tōna tino hiamoe i te āta mātakitaki mai a Aroha kei hē te haere.

Ka tae ki te kāinga (i muri i te taraiwa hē i te tiriti anga tahi), ka kuhuna ngā kōura ki roto i te pākete, ka tāpiritia atu te wai kia puta ai te paru.

Kātahi te rangi pai!

¡Binguito!

2008-08-14T14:40:00.000-07:00

E kī! E kī! Ka titiro ki tō māua taunga ipurangi nei, na, ka kite i te karere a Tau 4 me Whaea Ngāwaiata, ka nui te koa!

Nō reira, e te Tau 4 – tēnā koutou, tēnā koutou!

Inapō i haere mātou ko Viviana, ko Paula ki te wharekai Mehikana Jalisco. He pō wharewhare hei mahi moni mo te ranga o Benjamín, te tama 14 tau a Viviana. Karangahia ai e rātou ko te bingo, ā, ko te rārangi ko te ‘binguito’.

I reira tētahi kaiwaiata wahine, te pai o tōna reo! Kāore rawa tētahi o mātou i toa, ehara te kai i te tino mehikana, engari he pai ngā margarita, ā, he rawe te pō. Kua waia rawa au ki te te reo o konei me tōna tangi me tōna rere, ina rongo i te reo Ingarihi i te pouaka whakaata ka ohorere. Heoti, hoki rawa ki te kāinga i te tūruawēpō!

Na, ka oho moata i te ata, ka haere tahi māua ki te kura. Kua haere atu a Aroha ki te mātakitaki i tētahi o ngā kaiako Ingarihi engari i hoki taua wahine ki te kāinga me te tuarā mamae. Na, ka waiho ko Aroha anahe whakaako ai i te Octavo Grado A (Tau 9) mo ngā karāehe e rima – koina te roa o te ako Ingarihi i ngā Rāwhā! Ka rua ngā karāehe ka haere mai a Aroha ki te tiki mai i a au, kua hoha i te hoihoi, kua hoha hoki ngā tamariki i te uaua o te mahi, na, ka haere atu ki te āwhina.

He ranga pai, engari e rima ngā karāehe mo te kaupapa kotahi! Otirā ka tau rātou ki te mahi, ahakoa he uaua tonu ki a rātou te mahi wahangū. Ka hoki ngenge whaka te kāinga, engari i peka atu ki El Portal kai ai i te kawhe kia piki ai anō te wairua. Ka mutu, ka hoki ki te almuerzo – he kuku, he ika, he sauvignon blanc. Na, kua hoki a Aroha ki te kura tiaki ai i te Tau 6, e rua karāehe anō o te Ingarihi, ko te tūmanako ka hoki ora mai ki te kāinga...

Ā, kātahi ka hoki ora mai a Aroha me te koa i te nuinga o ngā mahi a ngā tamariki o tana karāehe!

Cueca, Coro, Ecuaciones

2008-08-13T13:31:00.000-07:00

Inapō i haere atu au ki te tūtaki i a Aroha i te kura, ā, ka haere tahi ki te ako i te cueca. Koina te tino kanikani a ngā Chileno. I ia Rārua, i ia Rārua tū ai te karaehe cueca kia rite ai rātou mo te 18 o Hepetema, koina tō rātou tino rā, te rā i riro ai i a rātou te mana motuhake.

Ehara rawa te kanikani rā i te ngāwari. Ka nuku kia pērā me Igor, me te hoa o Frankenstein. Ka nuku te waewae katau ki katau, ā, ka whai atu te waewae mauī, engari kāore e hikina i te papa. Na, ka hurihuri haere te tāne me te wahine, me te rūrū i te aikiha. Kāore rawa ōku waewae i te whai i ngā tono a te hinegaro! Na, ka hoki ngenge, ka hoki mamae ki te kāinga.

Me te rawe o te ata nei i te kura! Ko te karāehe tuatahi ko te reo Ingarihi me Cuarto Medio B. Koina te ranga o Sebastián, ahakoa he tama tino pai, ko ia te waha nui o te kura. Kīhai rātou ko ōna hoa i tau ki te mahi. He kairīwhi hōu te kaiako, na, ka waiho rā i a rātou kia kōrerorero. E rima meneti kua pau taku aroha, ā, ka huri ki te whakarite mahi mā tērā, mā tērā. Nāwai rā kua tau rātou katoa ki te mahi. Ngā pūkenga o Te Koutu! Engari tonu, he mea hei ako i konei – kāore anō au kia kite i te kaiako e riri ana, ka hoha, engari kāore e hāmama. He hunga manawanui rātou.

I muri i tērā i karangahia ahau e te kaiako waiata kia āwhina i a ia. I te whakaako ia i te waiata Wīwī ki te rōpū waiata o te kura tuatahi engari i te whai i te whakahua Pāniora mō ngā kupu, he kūware no te kaiako ki te reo Wīwī. Kātahi te pai o te rōpū rā, no te Tau 4 ki te Tau 5, tokoono ngā tama, kotahi te kōtiro, te rawe o ngā reo! Me tō te kaiako hoki!

Ko te karāehe whakamutunga ko te Octavo Grado A, he rite ki te Tau 9. Ko tā rātou, he whakamātautau poto mō ngā whāritenga. Ka mutu, ka māka au i ngā pepa. Tokowaru i whiwhi ki te 0 rānei, ki te 1 rānei i te 7. Ka huri te kaiako, a Raúl, ki te kōrero i te aro ki te ako. Ka kite au kua wātea te rūma ki tāhaki, ā, ka īnoi atu ki a Raúl kia tukuna mātou ko taua tokowaru rā kia haere ki reira akoako ai i ngā mahi, na, ka whakaae mai.

Kātahi te mahi rawe ki a au! Ahakoa te paku o taku reo Paniora, ka mārama pai mai rātou katoa. Whai ai au i ngā kōrero a Raúl, arā, ko te tohu rite (=) e rite ana ki te rohe, la frontera, i waenganui i ngā whenua e rua. Ina whakawhiti tētahi mea ki tērā atu taha, ka huri hei tauhōu, arā, ka huri te tau tōrunga hei tau tōraro, waihoki ngā mea tōraro hei mea tōrunga. Ka tuhia pēneitia e rātou:

3x + 14 = -5 + 7x
3x – 7x = -5 – 14
-2x = -19 /:-2
x = 19/2

Tohu ai te /:-2 i te ‘wehea te whāritenga ki te rua tōraro’. Heoi anō he pai ā mātou mahi ko te rōpū iti rā. Hei te mutunga kua mau ngā tikanga i te nuinga o rātou. I whakaatu hoki i te rārangi tau oti o Te Koutu ki a rātou, na, ka tino mārama ētahi i reira. Ka mutu, ka mihi mai, ka rūrū i te ringa, ka kihi mai. E hoa mā, he ouou noa iho ngā mea pai ake i te whakaako tamariki!

9 Akuhata 2008

2008-08-11T10:24:00.000-07:00

I tēnei rā i haere mātou ko Viviana, ko Paula ki te taunga rererangi. Kei te taha o te papa rere te karapu rererangi. Kua whakaritea te whare karapu hei wāhi hui mō ngā tāngata o AFS. E 60 pea ngā tāngata i tae atu, mātua mai, tamariki mai. He hui e tūtakitaki ai i ngā tāngata kātahi anō ka tae mai (he pēnei i a māua ko Aroha), i ērā hoki e rere atu ana, i te hunga hoki kua roa te noho i Chile nei.

Ko te kai, ko te asado, arā, te kai rorerore. He rawe te mīti o konei, me ngā notinoti, los longanizas, koina ngā notinoti pai rawa i kai ai au! Kainga ai i roto i te parāoa hōu, ka karangahia ko ngā choripán, e whā i pau i a au!

Ka mutu te kai, tūtū ai te hunga haere ki te kōrero, ki te whakangahau. Kei mua noa atu ngā Māori mo te whakangahau! I te korero hoki ki tētahi kōtiro i tae mai i te rererangi i tae mai ai te famoso Īhaia. I haurangi pai taua Māori rā me ōna hoa tokorua no Ahitereiria i runga i te rererangi. I te omaoma haere. I tangi hoki te tama no Ahitereiria, he nui no te haurangi te take!

Hei taua pō i haere mātou ko Viviana, ko Quemel ki te kai, engari i wehe i te kāinga i te 11:30 pm! Ohorere pai māua ko Aroha kia kai tina i te 1:00 am! Engari te pai hoki – he parilla (mīti kau, poaka, heihei tunutunu), he mango sour, he waina whero. Engari te pai o te waina. Kāore ō māua hoa i te whakapono mai ki te wā e kati ai ngā kīhini wharekai i Aotearoa.

Me tūpato rawa māua kei mōmona rawa!

He Mihi • Saludos • Greetings

2008-06-18T07:20:00.000-07:00

Tēnā rā koutou!

E ngā whanaunga, e ngā hoa, ka nui ngā mihi ki a koutou katoa. He mihi maioha hoki ki a rātou kua mene atu ki te pō – ō tātou mātua, tūpuna i whai wāhi ai tātou i te ao hurihuri nei.

Tēnā! Kua whakaritea te taunga nei hei rātaka mahi, rātaka whakaaro mō tō māua nohonga atu ko Aroha ki Chile. Kei hoha mai koutou i aku kōrero roa rawa!