Te Taenga ki Mehiko

 Hī tīmatanga, he pai te rerenga mai. He rawe hoki te titiro ki raro ki ngā tini whare o La Ciudad de México, ānō he awa rangitoto e rere iho ana ki te moana i tū ai a Tenochtitlán, e hia rautau rā i mua. Ka tau te rererangi ki te wāhanga hou o te taunga rererangi. Kātahi te kūwawa! Kotahi hāora e rārangi ana, e rapu ana i ngā tūeke, ā, ka tae tōmuri atu ki te tereina. Me mihi ki tētahi i hōmai rā i te 10 pesos kia eke ai ki runga i te pahi! Te taenga atu ki te hōtera, kua kati te pārā, ā, kāore he margarita hei whakanui i te taenga atu! Engari te ururua o te tāpapa i runga i te moenga rangatira!

Te ohonga ake i te ata, he kai mehikana te whāinga. Te pai o te kai i ngā hua rākau o konei, me ngā hēki i te salsa verde me ngā frijoles refritos, aī, te reka.

Ka rite mātou ka haere atu ki te meterō. Tokotiti ngā tāngata o runga, ā, ka mārama ki te take i te taenga atu ki Pantitlán. Kua kore te rārangi matua, ā, me eke pahi kia tae ai ki te pūtahitanga. Ahakoa te roa o te haere me te tū ake, me mihi ki te iwi me tō rātou manawanui me te harakoa ahakoa te pōreareatanga. 

Ka tae ki te marae nui o te tāone, he aha hoki i reira?! Ko te ahurei pukapuka, ka piki tōku ngākau, ka heke tō Aroha. Ahakoa te hiahia kia takaroa te noho atu, ka hokona ētahi o ngā pukapuka no te pātaka Algarabía (te pai hoki o taua kamupene tā pukapuka), ā, ka tika te haerenga atu ki Café de Tacuba kai ai i ngā quesadilla, ā, ko tā Aroha ko ngā flauta.

Hei hokinga mai ki te hōtera, he tekihi te whiringa, he mea rangatira (tēnā, īnoia te utu i mua i te ekenga!). Ko te pūkoro anō i whakamahara mai i a māua ki te manawanui me te harakoa o ngā Mehikano i runga i taua pahi haere whatiwhati rara!

Kānata

 I aku hokinga ki Kānata nei, ka pātai ake mehemea ha kaha tonu te hononga atu. 12 tau au e noho ana i te whenua, i te 8 ki te 20 tau te pakeke. I te hokinga atu ki Aotearoa, kua Kānata te whakahua, kua Kānata hoki te hanga o ngā whiringa. Hokihoki tonu ai, ka kitea te korekorenga ake o aua hanga i te roanga o te noho atu ki wāhi kē.

Otirā, ka mīharo tonu i te ātaahua o Vancouver nei. Kātahi te ngahuru ko tō Kānata! Me ngā maunga e tare mai ana i runga i te whanga herenga waka. He pērā me ērā atu o ngā haerenga mai ki konei, ka peka atu ki te wharekai Cordero. Kāore i kai i te hāmana i tēnei wā, engari i te hokarari kē, me te reka hoki!

Heoi anō, i kata au i te kitenga iho i te karere i runga i te pātara hopi. Me te heketua hoki! Te nui o te wai hei hari atu i te paraweta! Ka raruraru hoki a Kahuhunu i te tata o te wai!

Kua hāpainga anō te pahī!

 Engari te pahī! Tokorua noa iho māua ko Aroha. He tōmuri hoki te hāpainga ake, ko te kōpiro iti te take. Kāti, hei aha te amuamu! Taihoa, me amuamu, ka tika, i te nanakia i raruraru ai taku pae PukaMata! Ko ia hoki te take i hoki mai ai au ki tēnei pae tukutuku kōrero, tukutuku whakaahua. Otirā, ko tāku ko te rapu i ngā painga raruraru!

Ka toru hāora, ka rere atu ai ki Kānata hei karo i ngā tikanga herehere tangata o Amerika, arā, kia tatū ai te whā marama o te noho ki Mehiko.

Ko te tūmanako ia, ka tiakina ngā piringa katoa e ngā mana, e ngā tapu.

Tēnā, kōkiri!

ADIOS SEGOVIA

Me hoki pea i te takurua!

Kei runga māua i te tereina e wehe ana i Hekōpia. Kāore rawa i te hiahia kia wehe, engari kua huri whaka te kāinga te ihu o te waka.

He maha ngā wāhi i tae atu māua i ngā tau kua hipa, engari he ouou noa iho ngā wāhi e rite ana ki Hekōpia! Otirā, he maha ngā wāhanga o Peina kei te karanga mai. Ko tā Aroha me hoki māua ki konei whakanui ai i tōna rāwhānau 60! Nō reira, me penapena moni.

SEGOVIA - TE TĀWHANAWAI

Kua takaroa rawa au ki te patopato kōrero. No te ngenge o te tangata tāwhaiwhai, neha? Engari i te ata nei i oho rawa au i te whaiwhai atu i te tāwhanawai o Hekōpia nei.

Kua kite au i ngā tini whare karakia me ngā pā tūwatawata o te ao waha Paniora, engari te kitenga atu i te mahi whakahirahira nei a te Rōmana! Ahakoa te pai o aua whare karakia me ngā pā tūwatawata rā, me mihi te publicum bonum, arā, te manaaki-ā-iwi o ngā Rōmana. Engari tātou e āwangawanga ana i te ora, i te mārama o te wai. Ehara rawa i te mea hōu!

I kite māua i te tāwhanawai inatahi rā, engari i whakatau au ki te whai atu i te tāwhanawai i tētahi pito ki tērā atu. Ka haere atu au – i te ānini te māhunga o Aroha] – ki te pātū tōtonga o te tāone tawhito. 

Rere mai ai te wai i rāwāhi rā.

Ka heke ki raro, ā, ka whai whaka te tonga i te tāwhanawai. Ka piki, ka piki, ā, ka kore ngā pewa. Nāwai rā ka tae atu ki te whare whakapaipai, arā, he whare e totohu ai ngā parapara, ngā onepū ki raro ki te kōrua ki rere atu ai te wai mārama.

I roto i te whare whakapaipai.

 

Ka haere tonu ki te wāhi i puta ai te wai i raro i te whenua ki te tāwhanawai, i te kōrere wai i hangā ai e ngā Rōmana. 13 kiromita te roa o taua kōrere manawa whenua i rere ai te wai i te paemaunga o La Sierra de Guadarrama! 13 kiromita!

Anei te wāhi i puta ai i te manawa o te whenua.

Te waitohu o te korere wai i raro rā.

Na, ka tae te wai ki te koutu o Hekōpia, ka rere iho anō ki te manawa o te whenua kia toro atu ai ki te wāhi o te Alcázar! Åna, ko au tērā e rapurapu wairangi ana i ngā waitohu e tohu ana i te kōrere wai o raro. Mehemea he mīhini wā!

Ahakoa te aha me kōrero te nanakia o ngā Rōmana ki te hanga i ngā tāwhanawai – te mutunga mai o ngā pūkenga. Ko te tūporo matua i tū tonu ai ngā pewa nei!

Kotahi te tūporo kōhatu!

LA ALHAMBRA

Kāore ngā kupu whakapaipai e rahi ana hei whakaahua i te wāhi nei. Ko te mutunga mai o te ātaahua, o te rangatiratanga, o te oranga ngākau, o te aha, o te aha!

E pēnei ana aku korero ahakoa kāore māua i uru atu ki roto i ngā whare ake o ngā kīngi Arapi o te tāone nei. Me āta pānui ngā tohutohu, Uenuku! 

Heoti, kotahi te rongoā – me hoki mai anō ki Grenada nei!

GRANADA I

He tino taonga te tāone nei. He taonga i waenganui i ngā tini taonga! Kei roto māua i tētahi whare pākoro i te Calle Cocheras San Cecilio 5. He rawe te whare nei, ā, e pai ana te rahi. Kei raro tonu i La Alhambra, me te poupou o ngā ara kia tae ake ai ki reira!

He rite ngā tiriti o Granada ki ērā o Toledo me Sevilla. I muri i te taunga ki te whare pākoro i haere atu ki te rapu kai. Kua mea mai te kaiwhakarite, a Nacho de Chile, kia rapua atu te tiriti La Elvira, e mea ana i reira ngā bares de tapeo. Ka kitea te recomendado, ko Bodegas Castañeda. Ka noho ki te wāhanga ōkawa kai ai.

Ko tāku ko ngā pāpāringa poaka, carrilleras de cerdo, te reka hoki. Me ngā maramara rīwai, no te tihi o te maunga. Ka mutu te kai, ka whai māua i te awa Darro ma te paseo de los tristes, arā, ko te huarahi i whai ai ngā arapī pōuri i tō rātou pananga i Granada. Ka piki ki te tihi o te Albaycín titiro atu ai ki La Alhambra. Ka whai wāhi i te marae o te mezquita, arā, o te whare karakia Muhumana. I te tōnga o te rā ka rongo i te muʾaḏḏin e karanga i te hunga whakapono, na, i te titiro atu ki te taonga rā i riro i ngā Karaitiana i te tau 1492.


 Ka heke ki raro kua pō rawa, ā, ka hoki ki te kāinga.

SEVILLA

He uaua te patopato i ngā kōrero i muri te rangi roa, i te rangi wera. I te pērā ngā rangi o mua tata nei. Nō reira ka hē rawa te takataka o ngā kōrero!

Na, mehemea he rangi wera rawa, ko tēnei nā. I tae ake te pākiri ki te 39°! Ko te tikanga, ka tae atu ki te Alcázar a te hāpāhi i te iwa, engari i oho i te 9:20. I te haerenga atu ki te Alcázar, ka rapu atu  te Plaza de las Cruces, i te wāhi i kite ai a Raquel i a Jaime me Osito, me te kurī, i te taha o te ciego, o te tangata kāpō. Koina te tikanga o te whitiata nei! Ka tonoa hoki a Te Aramoana hei mea katakata māna.

Ka tae atu ki te Alcázar, kua roa rawa te rārangi. Nō reira i peke atu ki te Taberna Belmonte, i tapaina ki te ingoa o tētahi matador rongonui. Kei ngā pakitara ngā pane pūru e noi ana. He pai te kai, engari i raruraru te tūmau venezolano i taku chiste. Me tūpato, Uenuku! 

Ka haere māua i reira ki te catedral, engari i te kati i te whakatapu i ngā pirihi hōu. He rawe te rongo i te kaiwaiata.

Ka āta hīkoi atu i reira ki te mākete o Triana. Kua whai tuanui i te wā i a Raquel. I reira te wahine e hoko ana i ngā profiterole, hei mahi pea ma Bub Tali'ai! Ka whakawhiti i te rori ki te wharekai María Fultrica. Kātahi te wharekai - i te hanga, i te wāhi, i te kai. E piri ana ki te pito Triana o te arawhiti Isabel. Ahakoa te iti o te whare, e rima pea ngā papa. I noho māua ki raro, i te papa tuarua, ā, ka titiro atu ki roro o te arawhiti.

Me titiro ki te taunga ipurangi kia kite koe i te hanga o te whare. Engari kei te tino hiahia ki te kōrero i tā māua postre. Ko te ingoa ko 'ngā huamanu o te kōhanga'. Hangaia ai ngā mea katoa ki te tiakarete, hāunga ngā tōhua - he mea kātete rēmana ērā. Ko te pāpapa me te whakakahu, he tiakarete mā - he mārō tō tērā, he ngāwari tō tērā. Anā, ko te kōhanga, he mea hanga ki te tiakarete parauri me te pihikete parāone. Te mīharo ki ngā mahi a ngā kaitunu!

Ka mutu te kai, ka haere māua ki te tarawāhi o te awa Guadalquivir whakaari ai i ngā kōrero a Raquel rāua ko Elena. E toru ngā tangohanga kia tika ai! Āna, i tukuna hoki ki a Aramoana!

MADRID III

I oho i te 8:00 i te ata nei - kāore he mahi whare taonga, kāore he mokopuna. Ka mutu te whawhao pēke, ka peka atu ki te teihana tereina hoko ai i ngā tīkiti me te waiho i ngā pēke ki te pātaka taputapu.

El pintor Velázquez

Ka hoki atu ki te bar El Brillante kia kai i te parakuihi, kātahi hoki te parakuihi. He tiakarete Paniora mete bocadillo de calamares (he hanawiti ngū). Me te hoihoi o te wāhi rā, ko ngā tūmau e kārangaranga ana, tētahi ki tētahi. Te pai o te hoihoi!

Ka haere i reira ki El Prado. E tika ana ngā korero, koina tētahi o ngā tino whare waihanga o te ao. I pau taku kaha i te papa tuatahi, kīhai rā i tae ake ki te papa o Velázquez. Otirā i kitea ngā mahi a Goya – engari āna mahi papanga! – a Bosch, a wai rā, a wai rā. I te mōhio kē ki ētahi, engari ngā mea hōu, he pērā i tā Antonio Gisbert Pérez, El fusilamiento de Torrijos y sus compañeros en las playas del Málaga. He mea rahi rawa, me te maha hoki o ngā mea hei āta mātakitaki.

Ka haere atu i reira ki te wharekai o te hōtera Radisson. €14 noa iho te utu o te tina o te rā, ā, te reka hoki. Ko te mea tino pai ki a au ko te salmorejo, he hupa mātao me te gazpacho.

Ka mutu te kai ka karioi haere anō i ngā tiriti o te takiwā. Āe rā, ka pai te wāhi rā hei nohoanga!

MADRID II

I puta atu māua ko Aroha ki waho, ki te wera o Madrid. He uaua te whakawhiti i te tiriti! Ka mutu te torotoro i te teihana matua, ka rapu atu i te la calle Huerta, he tiriti e nui ana ngā bares de tapeo. Kātahi hoki te takiwā. Ka rata au ki te noho ki reira. E kī ana ngā tiriti i ngā toa waihanga. Me te mā hoki o te takiwā. Ka rongo te wairua i te wairua tau, i te wairua kaha o te tāone nei. He tawhito te nuinga o ngā whare. He maha hoki ngā rākau e pai ai te hau.

Ka noho mātou ki te kai i te bar Los Rotos. Te pai hoki o te waina i kai ai au, ko te Melquior no Ribera de Douros. Ka kai māua i te 'roto de alcachofa' me ngā 'puntilillas de calamar', arā, ko ngā pito kawekawe ngū.

I raro iho i te bar tētehi pakitara tupuranga otaota, he pakitara whare teitei. Ka hemo a Mereana i te tirohanga atu! E tata ana te toa tuitui e koakoa ai a Mereana - mehemea i konei!

Ko tā te tohu i te kokonga e mea ana, "Me te mea hoki ... māku koe e whakaako ki te tuitui!"

MADRID

Kua tae māua ko Aroha ki Madrid. Kei te Hotel Mediodía i te pūtahitanga o te tāone, i rāwāhi o te teihana tereina matua, o Atocha. Te pai hoki o te whenua e taunga ana māua ki te reo me ngā tikanga! Kotahi te mea whakapōuri ko te wehe i tā māua mokopuna i Frankfurt.

I tangohia te whakaahua nei inanahi i te hokinga mai i Rūpeka (Lübeck). Ka whā ngā wiki kāore he mokopuna!

I oho mātou i te 3:00, ā, i maranga kotahi hāora i muri i tērā. Kua wehe i te Hamburg i te 5:00. He mutunga kore nō ngā taraka i runga i te rori. I tētahi wā kua 160 km/h te tere o to mātou waka. Kāore he rori kē atu i ō Tiamani!

Kia mutu te hīrere o Aroha kua haere māua ki te tirotiro, ki te hoko tīkete tereina ki Toledo, ki te peka atu ki tētahi bar de tapeo.

TE RERENGA ATU

Kua tae ki Tāmaki, ā, kei te tāria te karanga kia haere atu ki te kēti o Guó Háng 国航, 
koina te 'Rererangi Haina'. E hia ngā pātai 
a te mokopuna i te haerenga mai mā runga 
pahi, "Āhea tae ai ki te taunga rererangi?" 
Na, kua tae, ā, kāore  e roa ka rere atu!

KA TAPOTU TE WAKA

Kei tō mātou marae, kei Ngākeipa ahau e tatari ana i a Aroha kia hoki mai i tana hui i te taha o tana rōpū. Ko tā rātou ko te whakarite i a rātou mo te haerenga ki Pāturi [Hamburg]. Engari los Fairhalls e hoki atu nei ki taua tāone rā e tū ana a Rauru. Ko te mea hoki e harakoa ana te ngākau, ko te haerenga o te mokopuna i tō mātou taha!

Hei aha ngā moni ka pau i te haerenga atu, ko te hikinga o te ngākau te mea nui. I konei a Hamu rāua ko Hēni Mītere e mea ana, "Auf wiedersehen!" Koina tāku ki a Rauru i tērā atu tau.

VILLARRICA a BUENOS AIRES 1

Kia ora koutou katoa!

Kātahi te mea hei whakapōrearea i te tangata ko te whakakīkī i ngā whāwhārua o te rātaka. Es decir, ehara i te whāwhārua o te rātaka ake – no te hinengaro kē ērā!

Otiia, me whai tonu, kei wareware i a au ngā mahi papai o te wiki nei. Hei tīmatanga ka hoki atu ki Villarrica, ko Mallolafquén i te reo Mapuzungún. Mapu - whenua, che - tangata; zungún - reo.

I te Rārua rā, i te 16 o Mei, i hui mātou ki roto i te wharekauhau o te tāone. Nāku te mihi o  te kauhau a Tony rāua ko Bruce, nāku hoki te haka i ārahi. Kātahi ngā Mapuche ka mahi i te afafan, i te karanga whakamihi, kia toru ngā wā. I te koa rawa a Anahí.

Ka mutu ngā kauhau, ka haere atu ki te wharekai. I reira ka tohe te machi kia noho au ki tana taha. Kātahi te pai o ā māua kōrero. I mōhio te wahine rā ki tōna mana tohunga i a ia e tamariki ana. E rima ngā tau i tīmata ai ngā moemoeā matakite. Ka kitea tōna mana i a ia ake, i ōna hoa haere hoki.

Ka ao te Rātoru, ka haere atu mātou ki te tāone o Leftraru [Lautaro]. I haere māua ko Aroha ki reira i te tau 2008 kai ai i te whare o Francisco Huenchumilla, ko ia te mea o Temuco i tērā wā. Nō tērā tau i tae ai ia ki te kura me ētahi atu Chilenos.

Heoi anō, i haere mātou ki waho o te tāone ki te kura iti o Vega Larga. Ka tūtaki i te tumuaki me ētahi o ngā kaiako, ā, ka haere ki te kite i ngā ākonga, Tau 5 – 7 nei, e whakamahi ana i te püron [he pērā me te quipu o ngā Quechua] hei whakaatu i te maha o tētahi mea. Ehara i te hunga waha Mapuzungún te nuinga, tata nei ngā mea katoa. I te mutunga atu he kura taha Mapuche. Ka nui ngā mahi kei mua i a rātou mehemea e hiahiatia ana te ora o te reo.

VILLARRICA

Kei Villarrica au i tēnei wā. Kua tīmata kē te wānanga. Hei āpōpō kōrero ai a Tony rāua ko Bruce.

Ko te āhua nei me hoki whakamuri ki te tūtakitanga i a rāua i te Rātapu. I te hōtera hoki a Daniel Orey, he Marikena e noho ana i Brasil. Ka mutu ngā mihimihi, ka haere atu mātou ki La Bifería hapa ai. Na, i hapa hoki. E whā ngā pātara merlot o Tres Palacios i pau i a mātou! Aroha ana te tūmau. Kāore e kore i hōhā ia i a mātou e ngana ana ki te whakatau i te ao whānui!

Ahakoa te pō i oho sin resaca au i te ata. Ka mutu te parakuihi me te mahi paerewa, ka haere atu ki te taunga rererangi. I reira i tūtaki i a Anají rātou ko Mariana Ferreira o Brasil, ko Marta Civil o Peina. Na, ka rere tahi mai mātou ki te taunga rererangi hōu o Temuco, ā, ka haere tika mai ki Villarrica nei.

I te mākūkū noa a Villarrica, he pērā me te wā i tae ai māua ko Aroha ki Temuco i mua, i te tau 2008. He makariri hoki, ā, ka tino ngau i te kaha o te takawai. Mōtuhi ana te tāone katoa i te auahi wahie. Kua pērā hoki ngā makawe me ngā pūeru, mōtuhi kau ana.

I te 8:30 i tae atu ki te wharekai Las Brasas kai ai i te mīti. Te nui o te mīti e pau ana i a au i Tire nei. Kua waia hoki ki ngā pisco sours. Koina pea i au rawa te moe i te pō, te pō tuatahi i au ai!

Te ohonga i te ata nei, ko te ohonga ake ki te hanga ātaahua rawa o tēnei takiwā. Ko te marino o te moana me te hanga rangatira o te maunga puia o Villarrica, ka mau te wehi!

SANTIAGO de CHILE

Kua tae kē au ki Tire, ā, ko tēnei te pō tuarua i te Hotel Neruda. Kua tae mai hoki a Tony rāua ko Bruce. I haere atu mātou ko Daniel ki te whare kai La Bifería inapō. He pai rawa te kai me te waina, te merlot o Tres Palacios. Ahakoa he Marikena a Daniel, kei Brasil ia e noho ana. I te kōrero ia i te hekenga o te hunga tātai-ā-iwi. Me āta whakaaro e tātou, kei hemo!

Inanahi i haere atu mā runga Metro ki Baquedano tiki atu ai i te paihikara. I te taha o te awa Mapocho he ara paihikara, el Ciclovía, e 21 kiromita te roa. Na, i haere i tētahi pito ki tērā atu, me te hoki atu! He rawe te ekenga, me te kite i ngā hanga rere kē o tērā wāhanga, o tērā wāhanga o Santiago.

Hei āpōpō rere atu ai ki Temuco. I te kōrero mātou i te rautaki hei āwhina i a Anahí. E whakaaro ana a Tony kia pōhiritia ia ki Aotearoa.

NGĀHAUPAPAI • BUENOS AIRES 2

Kei te taunga rereranga Newbery e tatari ana kia rere atu ki Tire. Kua kino a waho, kua heke roa te ua. Ahakoa i te taha tonu o te awa whānui rawa o La Plata, kāore rawa i te kite atu i Uruguay i rāwāhi rā. ¡Qué lástima!

Kātahi anō te tinana ka waea ki te hāora o konei, engari inanahi tē au te moe, tē oho roa hoki i te rā. Otirā, i puta atu i te hōtera hāerere ai. Kātahi te tāone o ngā whare papai, o ngā momo hanga katoa, Paniora nei, Ingarihi nei, aha nei, aha nei. I te hokinga i San Telmo i kite ai i te whare nei. He ātaahua, he weriweri ngātahi nei, koina au i rata atu ai! Ka aroha hoki, kua riro i a Starbucks!




I te hokinga ki te marae matua i kite i te wharekai o El Querandí. Ko ngā querandies ngā tāngata whenua o konei i te taenga mai o ngā Paniora. Tokotorutou rātou e takahi tonu ana i te mata o te whenua hei querandí. Ahakoa te tokomaha o ngā uri, kua hemo te reo. Ko te nuinga o aua uri e kūare ana ki tō rātou hekenga i te iwi.

Engari te ingoa o te wharekai! He mea porteño rawa te āhua me te kai. I kai au i te taraute, he reka, he pai hoki te waina mā, he torrontés, hei kinaki. Hei pūrini, he flan. He pai kē atu ā Yolanda i Oahaka. Ahakoa i raruraru ngā tūmau i te tokomaha o ngā tāngata kē atu, he pai tonu te taiao o te wharekai, me te āta noho ki te pānui tonu i te pukapuka a Biesta.

Kei wareware i a au te mea pai rawa o te rā! I rangona ake te karanga a te tamaiti, "Kei taka te urunga o Kea." Kātahi te oranga ngākau.

NGĀHAUPAI • BUENOS AIRES

Tēnā koutou, e te mano, e te tini o ngā tāngata e whai ana i ngā rātaka reo Māori pēnei i tēnei nā.

Kāore anō ahau kia patopato i aku mahi, i aku whakaaro i te wā roa nei. Otirā, i muri i te kai i te mīti reka rawa me te inu i te waina pai rawa o konei, o Argentina, kua rite ahau ki te hoki ki te mahi nei. Ko te mea hoki, kāori anō taku tinana kia waea ki te hāora hōu! Ko te 1:37 i te ata o te Rāwhā i Ngāhaupai!

I tae mai au ki te hōtera ruharuha nei, ki te Hotel Goya, i te 6:30 i te ahiahi. Ka rite aku tūeke, ka haere ki te tango moni hei hoko i te hapa. I te mutunga ake i uru atu ki roto i te whare kai nei, i te Bodegón de Buenos Aires. Ka kite i te hanga pukupuku o te reo Pākehā, neha?

Torutoru noa iho ngā tāngata i te tīmatanga, engari, nāwai rā, nāwai rā, he whare whawhao kē! Me te kai, he taketake nei te hanga, engari te reka! I te pānui hoki i te pukapuka a Gert Biesta. He rongoa kē atu hei hiki i te wairua i te kai whakaora, i te waina whakatau, i te pukapuka whakaihiihi, i te hunga harakoa o konei? I tua atu i te whānau, i te mokopuna?

Me hiki te wairua, ka tika, i heke rā i te korokoro o Te Parata. Kei te tāria tonutia te karanga kei taka te urunga o Kea. Ka pēhea, taihoa, ka pēheatia a Tamatekapua i te ao nei. Engari rā, ehara ia i tōku tauira, ko te mokopuna kē pea!

Kei wareware i a au, me mihi taku iwi, a Ngāti Rangiwewehi. Tēnā koutou! Āe, koira tētahi e rata atu ana ki ngā kōrero o Uenuku i ā Uenuku. Ā, tō tātou reo me te rerenga kētanga o te o i te a!

Ahakoa taku wairua ake, tokomaha ngā tāngata o Ngāhaupai ehara i te koa.

Te Whare Korea

Ina pō i haere mātou ko Tony, ko Colleen, ko Tamsin, ko Troels ki Te Whare Korea. I reira te tari matua o te Manatū Tūruhi o te whenua nei. I reira hoki te wharekai me te whare whakaari. Te pōuri hoki kāore he tēpū e wātea ana mo te kai hākari, nā reira i peka atu ai ki te wharekai rauwhiri. He pai noa te kai, engari ko te tino mahi o te pō ko te whakaaturanga kanikani i te whare whakaari. Te rawe hoki! Ahakoa te mania o ngā taringa i te tīmatanga, ka waia haere ki ā rātou mahi whakatangitangi. Ka āta kitea te hāngaitanga ki tō rātou reo me ā rātou kanikani.

Tērā tētahi wahine e waiata ana i te waiata aroha, he mōteatea rawa te hanga. He tino kaiwaiata taua wahine rā, me te tangi pai o tōna reo whakaari. I te pērā a Hineitūrama mā?

Te ātaahua o te kanikani a ngā tāhiri. E rua aua kanikani, he mea tawhito, he mea hōu hoki. Te ngāwari o ngā nekehanga, engari te haurokuroku hoki. Katikati ai, whakatuherahera ai ngā wāhine i ngā tāhiri hei wāhanga pūmau o te whakatangitangi. Ka mau te wehi.

Me te hunga tāne hoki, he rawe ā rātou kanikani. Mau ai i ngā tāne tētahi rīpene roa, e iri ana i ō rātou pōtae. Ka tahuri ki te kanikani ka tōrinorino haere aua rīpene rā, ānō he poi poikore! I tētahi te rīpene e roa atu ana i te toru mita, ā, ka tōrinorino haere i te rūrū o te māhunga, ā, ka pekepeke haere te tangata kei mau te rīpene i ngā waewae. Mīharo kau ana!

Hei wero mā tātou!

Kāore e kore kua kite koutou i te kino o te rātaka nei. Kua maha kē ngā rangi kāore he kōrero. Otirā, kātahi anō ka puta i 'Te Rēhia Tātai', he wāhi whakaatu. I reira ngā kamupene e hokohoko ana i ā rātou pukapuka, kēmu, rauemi. I hinga au i reira, koina i hokona ai kia whā ngā pouaka 'Puzzlia' hei rauemi mō āku ranga Tātai.

Engari ko te tino painga o te rēhia rā ko ngā mahi a ngā ākonga koreano. Kātahi tō rātou hari, tō rātou whakahī, tō rātou kaha, kaha nui nei! I te tino hiahia kia uru atu ngā kaitirotiro ki roto i ā rātou mahi. Tō rātou kaha hoki ki te uru atu ki roto i ngā mahi a tangata kē.

Na, koinei au e whakaaro ana, me tino hiki e tātou ā tātou mahi e mau ana ngā hanga tātaitai, ahakoa ko te mūrere, ko te kōwhaiwhai, ko te raranga, ko te aha, ko te aha. Kei patua e te whakamā, e te ngoikore, e te aha rā!

I haere atu i reira ki te whakaaturanga pānui. Koinā hoki hei mahi mā tātou. Ka rata ngā tāngata o te ao ki ngā mahi a ngā tūpuna. E hoa mā, kei wareware i a  au te whai i ngā whakaaro nei!