viernes, 13 de julio de 2012

Te Whare Korea


Ina pō i haere mātou ko Tony, ko Colleen, ko Tamsin, ko Troels ki Te Whare Korea. I reira te tari matua o te Manatū Tūruhi o te whenua nei. I reira hoki te wharekai me te whare whakaari. Te pōuri hoki kāore he tēpū e wātea ana mo te kai hākari, nā reira i peka atu ai ki te wharekai rauwhiri. He pai noa te kai, engari ko te tino mahi o te pō ko te whakaaturanga kanikani i te whare whakaari. Te rawe hoki! Ahakoa te mania o ngā taringa i te tīmatanga, ka waia haere ki ā rātou mahi whakatangitangi. Ka āta kitea te hāngaitanga ki tō rātou reo me ā rātou kanikani.



Tērā tētahi wahine e waiata ana i te waiata aroha, he mōteatea rawa te hanga. He tino kaiwaiata taua wahine rā, me te tangi pai o tōna reo whakaari. I te pērā a Hineitūrama mā?



Te ātaahua o te kanikani a ngā tāhiri. E rua aua kanikani, he mea tawhito, he mea hōu hoki. Te ngāwari o ngā nekehanga, engari te haurokuroku hoki. Katikati ai, whakatuherahera ai ngā wāhine i ngā tāhiri hei wāhanga pūmau o te whakatangitangi. Ka mau te wehi.

Me te hunga tāne hoki, he rawe ā rātou kanikani. Mau ai i ngā tāne tētahi rīpene roa, e iri ana i ō rātou pōtae. Ka tahuri ki te kanikani ka tōrinorino haere aua rīpene rā, ānō he poi poikore! I tētahi te rīpene e roa atu ana i te toru mita, ā, ka tōrinorino haere i te rūrū o te māhunga, ā, ka pekepeke haere te tangata kei mau te rīpene i ngā waewae. Mīharo kau ana!

Hei wero mā tātou!


Kāore e kore kua kite koutou i te kino o te rātaka nei. Kua maha kē ngā rangi kāore he kōrero. Otirā, kātahi anō ka puta i 'Te Rēhia Tātai', he wāhi whakaatu. I reira ngā kamupene e hokohoko ana i ā rātou pukapuka, kēmu, rauemi. I hinga au i reira, koina i hokona ai kia whā ngā pouaka 'Puzzlia' hei rauemi mō āku ranga Tātai.


Engari ko te tino painga o te rēhia rā ko ngā mahi a ngā ākonga koreano. Kātahi tō rātou hari, tō rātou whakahī, tō rātou kaha, kaha nui nei! I te tino hiahia kia uru atu ngā kaitirotiro ki roto i ā rātou mahi. Tō rātou kaha hoki ki te uru atu ki roto i ngā mahi a tangata kē.



Na, koinei au e whakaaro ana, me tino hiki e tātou ā tātou mahi e mau ana ngā hanga tātaitai, ahakoa ko te mūrere, ko te kōwhaiwhai, ko te raranga, ko te aha, ko te aha. Kei patua e te whakamā, e te ngoikore, e te aha rā!

I haere atu i reira ki te whakaaturanga pānui. Koinā hoki hei mahi mā tātou. Ka rata ngā tāngata o te ao ki ngā mahi a ngā tūpuna. E hoa mā, kei wareware i a  au te whai i ngā whakaaro nei!

sábado, 7 de julio de 2012

KOREA 2012

Kāore anō kia tuhituhi i te rātaka nei mo te wā roa, engari anei au i Korea e noho ana i te roro o te Heratana i Hēuru [Seoul]. nō reira, e hoa mā... 

I rere mai au i te taha o Tony Trinick. E mihi tonu ana ki ā mātou mahi rangahau i whai huruhuru ai te manu nei! Otirā, no te Rāwhā rānō tīmata ai te rerenga nei. Ka mutu ngā whakariterite mahi i te kura, ka whawhao i te tūeke, ā, ka haere atu au ki te taunga rerenga rererangi i te taha o Aroha. I reira tūtaki ai i a Ruakiri e hoki mai ana i Pōneke. I te mau mōhiti pango i te iti o te moe me te nui o te mahi! 


Ka rere i Rotorua ki Tāmaki, ā, ka noho i te hōtera a Tainui, i te papa o runga rawa! I te ata ka heke anō ki te taunga rererangi, tatari ai i a Tony i te Karapu Koru. Ka eke māua ki runga i te rererangi ka ohorere i te tokoiti o ngā tāngata. Ka pai hoki, i te mea he tūru e wātea ana mō ngā taputapu. 


Ka tau ki te taunga rererangi o Narita i Tōkio, ka heke i te rererangi kia tatari ai i te mea tuarua. Ka peke atu ki te karapu o te Hononga Whetū engari kāore ō māua kāri i whakaaetia - me kōura rānō te mematanga! Heoti i peka atu ki tētahi toa iti inu ai. Nāwai rā kua wareware i a māua te wā. Ka oma atu ki te putanga kua kore ngā tāngata! Engari te waimarie i whakaaetia. 


I rere ki Korea nei ma runga i te rererangi Kotahitanga - te kino hoki! He hanawiti parāoa mā te kai, he iti hoki nō ngā tūru. I muri hoki i a māua ētahi hōia Marikena e noho ana. Te maninohea o ā rāua kōrero! Ko te kangakanga me te auau o te kōrero mō ngā kēmu rorohiko – he mea pakanga katoa. Koina hoki te mahi a ā rāua wāhine?


Tae rawa mai ki Korea nei kua pō. He tawhiti te taunga rererangi i te hōtera, engari he pai noa te pahi i tae atu ai ki reira. He rawe te hōtera, he pai rawa taku rūma. I runga ake i ngā whare matua i waenganui i ngā rākau paina o te ngahere. Te kakara hoki i te ata me te ahiahi.
Anei te whare ūnga motukā o te hōtera. Kei runga i te tuanui he māra e tupu ana ngā momo kōrau mo te wharekai. I runga ake, i waenganui i ngā rākau te wāhanga o te Heratana e noho ana au. Kua heke a Tony ki te whare matua noho ai.