¡Ladrones! Tāhae!

Engari ngā hanga rere kē e pā ai ki te tangata i te rangi kotahi!

I muri i te parakuihi i el Café Valerio (kua mōhio pai mai ngā meseros), ka haere mātou katoa ma runga tēkihi ki te wharetaonga waihanga, el Museo Nacional de Bellas Artes. Kei reira ngā mahi a ngā tohunga katoa o te ao waihanga – ko ā Dégas, ko ā Monet, ko ā Klee, ko ā Goya, ko ā Mea, ko ā Mea. Koina te hanga rangatira o te rā!

Ka hoki māua ko Aroha ma raro i te mea me peka atu ki te teihana Retiro hoko ai i ngā tīkiti ki Rosario. Kua hoki kē tōku māmā ma runga tēkihi, ā, kua hīkoi karatete atu a Valerie – i te aha, mā wai e hua? Ka tae atu ki te teihana, ka kite i ngā tohu e mea ana kua hokona katoatia ngā nohoanga tereina ki Rosario, nō reira ka haere tonu ki te teihana pahi i tērā atu taha o te mercado San Martín.

Na, ka taha atu i te mākete. I te mau taku kēhi kāmera me taku pōtae, a Chepe, i taku ringa mauī. Kātahi anō ka rongo i tētahi e kāhakihaki ana i te kāmera, kua uru atu te ringa o te tāhae i raro o te paki o te kēhi. Ka huri atu au ki te mamau i taua tangata rā, ā, ka rutua ki te papa, ko ia i raro.

Kua tīhaea atu te paki, ā, ka rere atu te kāmera ki te papa. I te ngana au ki te pupuri ki te tāhae me te toro atu ki te kāmera. Kātahi anō ka rere mai tana hoa, ka tangohia ake te kāmera, ka oma atu ai rāua ko tētahi atu hoa ki muri i ngā whare. Ahakoa taku hiahia kia mau ki te tāhae tuatahi kua whakawarea e ērā atu, ā, ka okeoke atu ia, na, ka oma atu. I te karanga atu a Aroha, “Koretake!” ki a rātou, ā, ka ngaro.

Ka tū ake ahau, ka tahitahi i ngā pūeru, ka tiki i te ringa o Aroha whakamākoha atu ai, ā, ka tahuri ki te teihana pahi. Ka whakatata mai tētahi tangata me aku mōhiti (i roto hoki i te kēhi i te taha o te kāmera). I te aroha mai ngā tāngata, engari ka taea te pēhea? Kua tūpono ngā mahi katoa i te tūrehutanga kanohi. I te tī noa a Aroha i te mataku me te riri, engari i te wherū ke au. Ahakoa tērā he taha koa tōku i rutua ai te tāhae tuatahi ki te papa. Koina te hanga kino o te rā!

Kei te whakaaro tonu mo te tokotoru rā. He taitamatāne, 17 rānei, 18 rānei te pakeke, he pai noa iho ngā pūeru. Kāore i tūkino mai, ko te kāmera anahe i hiahiatia ai. Kāore i tino moe inapō i te hurihuri o ngā whakaaro.

I taku ringa tonu te kēhi, me Chepe. Ka whiua atu te kēhi, ka haere ki te hoko i ngā tīkiti. Ka hoki atu ki te hōtera o aku whaea kōrero ai i te whānako. Ka mutu, ka hokona he kāmera hōu, ā, ka hoki ki tō māua hōtera. Ka hīrere horoia ai i aku tūnga, he rakunga noa iho. Ka tūtaki anō i ngā whaea ka peka atu ki te hapa. I runga i ngā tiriti ngā tini pepa, hurihuri noa. Ka pātai atu ki ngā kaitahitahi mo te take, ko tā rātou he tikanga argentino no te tau hōu. Ka pātai atu mehemea e hoha ana rāua, ka mea mai kāore, e rata ana rāua ki te tikanga!

I te 10:30 pm ka wehe atu aku whaea ki te taunga rererangi, ā, ka hoki māua ki te hōtera whakaaroaro ai i ngā tēnei ao rere kē e noho nei tātou!